New Delhi,તા,25
અદાણી ગ્રીન એનર્જી (AGEL) ની યશકલગીમાં વધુ એક છોગુ ઉમેરાયું છે. નવી દિલ્હીમાં આયોજીત એક કાર્યક્રમમાં અદાણી ગ્રીન એનર્જીને મેરકોમ ઇન્ડિયા એવોર્ડ 2024 એનાયત કરવામાં આવ્યો છે.ગુજરાતના ખાવડામાં 250 મેગાવોટના રિન્યુએબલ પ્રોજેક્ટને સફળતાપૂર્વક શરૂ કરવાનીઐતિહાસીક સિદ્ધિ હાંસલ કરવા બદલ કંપનીને આ એવોર્ડ એનાયત કરવામાં આવ્યો છે.
અદાણી ગ્રીન એનર્જીએ 2024માં કચ્છ જિલ્લાના ખાવડામાં વિશ્વના સૌથી મોટા રિન્યુએબલ એનર્જી પ્લાન્ટમાં ૨૫૦ મેગાવોટ સફળતાપૂર્વક કાર્યરત કર્યું હતું. ગુરુવારે (24 જુલાઈ) મેરકોમ ઇન્ડિયા રિન્યુએબલ્સ સમિટમાં કેન્દ્રીય મંત્રી પ્રહલાદ જોશી દ્વારા આ એવોર્ડ એનાયત કરવામાં આવ્યો હતો, જેમાં કંપનીની અસાધારણ સિદ્ધિને બિરદાવવામાં આવી હતી.
અદાણી ગ્રીન એનર્જીએ ગુજરાતના ખાવડામાં ભારતનું સૌથી મોટું અને વિશ્વનું સૌથી મોટું 5.2 મેગાવોટનું ઓનશોર વિન્ડ ટર્બાઇન સ્થાપિત કર્યું છે. આ શક્તિશાળી વિન્ડ ટર્બાઇન મુન્દ્રામાં અદાણીની પવન ઉત્પાદન સુવિધામાં બનાવવામાં આવે છે.
આ પ્રસંગે કેન્દ્રીય મંત્રીએ ભારત સરકારના સ્થિતિસ્થાપક અને આત્મનિર્ભર નવીનીકરણીય ઉર્જા ક્ષેત્ર માટેના કેન્દ્રિત પ્રયાસો પર પ્રકાશ પાડતાપાંચ મુખ્ય પ્રાથમિકતાઓની રૂપરેખા આપીહતી.તેમણે ભારતના સ્વચ્છ ઉર્જા પરિવર્તનને વેગ આપતી યોજનાઓ પર ભાર મૂક્યો હતો.જેમાં વીજ ખરીદી કરાર (PPA), મજબૂત ગ્રીડ અને સંગ્રહ પ્રણાલીઓ, સ્થાનિક ઉત્પાદન, જમીન ઉપયોગ ઑપ્ટિમાઇઝેશન અને નાણાકીય સહાયનો સમાવેશ થાય છે.
ભારતે 2030 ના લક્ષ્યાંક કરતા પાંચ વર્ષ પહેલાં બિન-અશ્મિભૂત સ્ત્રોતોમાંથી તેની સ્થાપિત વીજળી ક્ષમતાના 50 ટકા હાંસલ કરી લીધી છે.હાલમાં, ભારતની સ્થાપિત નવીનીકરણીય ઉર્જા ક્ષમતા 245 GW થી વધુ છે, જેમાં 116 GW સૌર અને 52 GW પવન ઉર્જાનો સમાવેશ થાય છે.
આંતરરાષ્ટ્રીય નવીનીકરણીય ઉર્જા એજન્સી (IRENA) ના તાજેતરના અભ્યાસ મુજબ, 2024 માં ભારતના નવીનીકરણીય ઉર્જા વિસ્તરણથી દેશને અશ્મિભૂત ઇંધણની આયાત અને પ્રદૂષણ સંબંધિત ખર્ચ ટાળીને લગભગ 4 લાખ કરોડ રૂપિયા બચાવવામાં મદદ મળી છે. આમાં ૧૪.૯ અબજ ડોલરની અશ્મિભૂત ઇંધણ બચત, ૪૧૦.૯ મિલિયન ટન CO2 ની બચત અને ૩૧.૭ અબજ ડોલરના આરોગ્ય અને વાયુ પ્રદૂષણ લાભનો સમાવેશ થાય છે.
ભારત ૫૦૦ ગીગાવોટ નવીનીકરણીય ઉર્જાના લક્ષ્ય તરફ સતત આગળ વધી રહ્યું છે. ઉર્જા મંત્રાલયે CEA, CTU અને પાવરગ્રીડ સાથે સંકલનમાં ૨૦૩૦ સુધીમાં ૫૦૦ ગીગાવોટ બિન-અશ્મિભૂત ઉર્જા માટે એક વ્યાપક ટ્રાન્સમિશન યોજના તૈયાર કરી છે.
