Washington,તા.3
અમેરિકામાં એચ1બી વિઝાને લઈને એક ગ્રુપ સમર્થન આપી રહ્યું છે તો બીજાં ગ્રુપનાં લોકો ભારતીય લોકોની વિરુદ્ધ છે. અમેરિકાનાં નવાં ચૂંટાયેલા રાષ્ટ્રપતિ ડોનાલ્ડ ટ્રમ્પે ફરી એકવાર આ વિઝા સિસ્ટમને સમર્થન આપ્યું છે. પોતાનાં છેલ્લાં રાષ્ટ્રપતિ કાર્યકાળ દરમિયાન એચ1બી વિઝા પર નિયંત્રણો લાદનાર ટ્રમ્પે તાજેતરમાં આ સિસ્ટમને ઉપયોગી ગણાવી હતી.
એવું માનવામાં આવે છે કે, ટેસ્લાના માલિક એલોન મસ્કના વિઝા સમર્થકને જોઈને ટ્રમ્પે પોતાનો દૃષ્ટિકોણ બદલ્યો હતો, જેણે ટ્રમ્પને ચુંટણીમાં પૈસાથી વધી મદદ કરી હતી. આ બદલાવ વિશે પૂછવામાં આવતાં ટ્રમ્પે નવાં વર્ષની ઉજવણી પહેલાં કહ્યું, કે ’મેં મારી સ્થિતિ બદલી નથી. મારું હંમેશાં માનવું છે કે આપણાં દેશમાં સૌથી વધુ સક્ષમ લોકો હોવા જોઈએ.
આપણાં દેશમાં સ્માર્ટ લોકોનું આવવું દુર્લભ છે. આવાં ઘણાં લોકોની જરૂર છે. અહીં હવે એવી નોકરીઓ હશે, જે પહેલાં ક્યારેય નહોતી. ભલે ટ્રમ્પ નોકરીની ઘણી તકો વિશે વાત કરી રહ્યાં હોય, પરંતુ તેમની રિપબ્લિકન પાર્ટીનો એક વર્ગ એવી દલીલ કરી રહ્યો છે કે, એચ1બીને કારણે અમેરિકન લોકો માટે નોકરીની તકો ઘટી જશે અને તેમનાં વેતનને અસર થશે. આનો અર્થ એ નથી કે કંપનીઓ એચ1બી વિઝા દ્વારા ઓછા વેતન પર લોકોને લાવે છે.
પગારની સ્થિતિ શું છે ?
યુએસ કાયદા અનુસાર, એચ1બી વિઝા ધારકને આપેલાં ક્ષેત્રમાં ચોક્કસ નોકરી માટેનાં સરેરાશ વેતન કરતાં ઓછા વેતન પર સમાન કામ માટે નોકરી આપી શકાતી નથી. આશરે, 60000 ડોલરથી ઓછું વાર્ષિક વેતન આપી શકાતું નથી. જો કે, ન્યૂયોર્ક જેવાં વિસ્તારોમાં, જો લઘુત્તમ પગાર આના કરતાં વધારે હોય, તો કંપનીઓ એચ1બી વિઝા ધારકોને વધુ ચૂકવણી કરે છે.
વર્ષ 2023 માં, કમ્પ્યુટર સંબંધિત નોકરીઓમાં એચ1બી વિઝા ધારકોનો સરેરાશ વાર્ષિક પગાર 132000 ડોલર હતો અને સરેરાશ વેતન 122000 ડોલર હતું. તેનો અર્થ એ છે કે આવા અડધાં વિઝા ધારકોનો પગાર 122000થી વધુ હતો.
શું છે શુલ્ક ?
આ વિઝા સિસ્ટમનાં સમર્થક એલોન મસ્કે પણ તાજેતરમાં કહ્યું હતું કે, આ સિસ્ટમમાં ખામીઓ છે, જેને વિઝા ધારકો માટે લઘુત્તમ પગાર વધારીને અને વિઝાના વાર્ષિક જાળવણી ખર્ચમાં વધારો કરીને સુધારી શકાય છે કારણ કે પછી વિદેશથી નોકરી લેવી મોંઘી થઈ જશે.
હાલમાં, કંપનીઓને નવાં એચ1બી વિઝા અથવા અગાઉનાં વિઝાના વિસ્તરણને લગતી અરજી માટે લગભગ 35 હજાર ડોલરની ફી ચૂકવવી પડે છે. જો તેઓ કર્મચારીના કાયમી રહેઠાણ માટે અરજી કરે છે, તો આ ખર્ચ 50 હજાર ડોલરથી વધી જાય છે.
ખર્ચ વધવાથી શું અસર થશે ?
અમેરિકન નિયમો અનુસાર, કોઈપણ કંપનીને ઈશ્યુ કરવામાં આવેલાં કુલ વિઝાના 2.7 ટકા થી વધુ આપી શકાય નહીં. વર્ષ 2024 માં, એમેઝોનનો કુલ વિઝામાં સૌથી વધુ 2.7 ટકા હિસ્સો હતો. તે પછી, કોન્જિનાટ 2 ટકા, ઈન્ફોસિસ 1.8 ટકા, ટીસીએસ 1 ટકા,આઇબીએમ 1 ટકા, એચસીએલ અને માઈક્રોસોફ્ટ 0.9 અને ગૂગલ 0.7 ટકા રહ્યાં હતાં.
નવાં વિઝામાં ભારતીય કંપનીઓને માત્ર 7299 વિઝા મળ્યાં છે. છેલ્લા એક દાયકામાં ભારતીય કંપનીઓએ તેમનાં વિઝાના ઉપયોગમાં 55 ટકાનો ઘટાડો કર્યો છે અને ખર્ચમાં 2000 ટકાનો વધારો થયો છે.
વિદેશ જતાં વિદ્યાર્થીઓને માર્ગદર્શન આપનાર કરિયર કાઉન્સેલરએ કહ્યું, કે ’કુશળ લોકોને લઘુત્તમ પગાર વધારવાથી ફાયદો થશે, પરંતુ એ પણ શક્ય છે કે અમેરિકન કંપનીઓ ભારત સહિત અન્ય દેશોમાં ઓફશોરિંગ વધારશે.
