Washington,તા.૨
અમેરિકાના રાષ્ટ્રપતિ ડોનાલ્ડ ટ્રમ્પ સરકારી ખર્ચમાં સતત ઘટાડો કરી રહ્યા છે. તેમની સરકારે તાજેતરના ઇતિહાસમાં જાહેર કર્મચારીઓની સૌથી મોટી છટણીઓમાંની એક અમલમાં મૂકી છે. આના કારણે હજારો લોકોએ પોતાની નોકરી ગુમાવી છે.આઇઆરએસ, યુએસએઆઇડી, એફઇએમએ અને ઇપીએ જેવી મહત્વપૂર્ણ એજન્સીઓ સહિત અનેક એજન્સીઓમાં ૨૦,૦૦૦ થી વધુ સરકારી કર્મચારીઓને છૂટા કરવામાં આવ્યા છે. આ પગલાથી સરકારના કામકાજ પર મોટી અસર થવાની ધારણા છે.
એવું નથી કે ફક્ત નીચલા હોદ્દા પરના કર્મચારીઓને જ સરકારી નોકરીઓમાંથી કાઢી મૂકવામાં આવ્યા છે, પરંતુ વરિષ્ઠ અધિકારીઓને પણ નોકરી મુકવાનો સમય આવી ગયો છે. સરકારના પુનર્ગઠન પ્રયાસોના ભાગ રૂપે ઘણા વરિષ્ઠ અધિકારીઓને બરતરફ કરવામાં આવ્યા છે. મોટાભાગના વરિષ્ઠ અધિકારીઓને દૂર કરવામાં આવ્યા છે કારણ કે તેમના કારણે બજેટ બગડી રહ્યું હતું. કેટલાક લોકોને યોગ્ય રીતે કામ ન કરવાને કારણે નોકરીમાંથી કાઢી મૂકવામાં આવ્યા છે. ૨૦ થી વધુ વિભાગોમાંથી લોકોને છટણી કરવામાં આવ્યા છે.
ઇન્ટરનલ રેવન્યુ સર્વિસમાં સૌથી વધુ નોકરીઓ ગુમાવવાનો કેસ નોંધાયો છે. અહીં લગભગ ૭,૦૦૦ કર્મચારીઓને નોકરીમાંથી કાઢી મૂકવામાં આવ્યા છે. ધ વોશિંગ્ટન પોસ્ટ અનુસાર, ૧૧૦ થી વધુ આઇઆરએસ ઓફિસો પણ બંધ થવા જઈ રહી છે. છટણીની બાબતમાં યુનાઇટેડ સ્ટેટ્સ એજન્સી ફોર ઇન્ટરનેશનલ ડેવલપમેન્ટ બીજા ક્રમે છે, જ્યાં આશરે ૫,૬૦૦ કર્મચારીઓને ૧૫ મિનિટમાં કાઢી મૂકવામાં આવ્યા હતા. પર્યાવરણીય સુરક્ષા એજન્સીને ૬૫% સુધી સ્ટાફ ઘટાડવાનો નિર્દેશ આપવામાં આવ્યો છે. ફેબ્રુઆરી ૨૦૨૫ માં ટ્રાન્સપોર્ટેશન સિક્યુરિટી એડમિનિસ્ટ્રેશન ના ૨૪૦ થી વધુ કર્મચારીઓને છૂટા કરવામાં આવ્યા હતા. ફેડરલ ઇમરજન્સી મેનેજમેન્ટ એજન્સીમાં પણ નોકરી ગુમાવવાની શક્યતા છે કારણ કે તેને ડીઇઆઇએ પહેલમાં સામેલ કર્મચારીઓને ઓળખવા અને તેમને કાઢી મૂકવાના નિર્દેશો પ્રાપ્ત થયા છે. નેશનલ ઓશનિક એન્ડ એટમોસ્ફેરિક એડમિનિસ્ટ્રેશનના ૮૦૦ થી વધુ કર્મચારીઓને છૂટા કરવામાં આવ્યા હતા. રક્ષા વિભાગના ૫,૪૦૦ કર્મચારીઓને બહારનો રસ્તો દેખાડવામાં આવ્યો છે.
સામાજિક સુરક્ષા વહીવટને તેના કાર્યબળને અડધું કરવા માટે કહેવામાં આવ્યું છે. નેશનલ હાઇવે ટ્રાફિક સેફ્ટી એડમિનિસ્ટ્રેશનએ તેના ૪% કર્મચારીઓને છૂટા કર્યા છે. ઊર્જા વિભાગએ ૨,૦૦૦ કામદારોને છૂટા કર્યા છે. આ ઉપરાંત, વેટરન્સ અફેર્સ વિભાગના ૧,૦૦૦ થી વધુ કર્મચારીઓ, યુએસ ફોરેસ્ટ સર્વિસના ૩,૪૦૦ કર્મચારીઓ, કન્ઝ્યુમર ફાઇનાન્સિયલ પ્રોટેક્શન બ્યુરોના ૭૩ કર્મચારીઓ, નેશનલ ન્યુક્લિયર સિક્યુરિટી એડમિનિસ્ટ્રેશનના ૩૦૦ કર્મચારીઓને નોકરીમાંથી કાઢી મૂકવામાં આવ્યા છે.
