Australia,તા.25
કેમેરોન ગ્રીન, ટ્રેવિસ હેડ અને કેપ્ટન મિશેલ માર્શે ઝડપી સદી ફટકારી અને ત્યારબાદ કૂપર કોનોલીના સ્પિન બોલિંગના કારણે ઓસ્ટ્રેલિયાએ રવિવારે ત્રીજી અને અંતિમ વનડે મેચમાં દક્ષિણ આફ્રિકાને 276 રનથી હરાવ્યું.
સૌથી મોટી હાર
આ દક્ષિણ આફ્રિકાની સૌથી મોટી હાર છે. આ પહેલા ભારતે 2023ના વર્લ્ડ કપમાં તેમને 243 રનથી હરાવ્યા હતા. જ્યારે, આ ઓસ્ટ્રેલિયાની બીજી સૌથી મોટી જીત છે. આ પહેલા, તેમણે 2023માં નેધરલેન્ડ્સને 309 રનથી હરાવ્યું હતું. જોકે, દક્ષિણ આફ્રિકાએ શ્રેણી 2-1થી જીતી હતી.
બીજો સર્વોચ્ચ સ્કોર
પ્રથમ બેટિંગ કરતા ઓસ્ટ્રેલિયાએ ગ્રીન (અણનમ 118), હેડ (142) અને માર્શ (100) ની મદદથી બે વિકેટે 431 રન બનાવ્યા. આ ઓસ્ટ્રેલિયાનો બીજો સૌથી મોટો સ્કોર છે. આ પહેલા ઓસ્ટ્રેલિયાએ 2006 માં દક્ષિણ આફ્રિકા સામે ચાર વિકેટે 434 રનનો સૌથી મોટો સ્કોર બનાવ્યો હતો.
હેડ અને માર્શે પ્રથમ વિકેટ માટે 250 રનની ભાગીદારી કરીને ટીમને આક્રમક શરૂઆત અપાવી. હેડે તેની કારકિર્દીની સાતમી અને માર્શે પોતાની ચોથી સદી પૂર્ણ કરી. કેશવ મહારાજે હેડને આઉટ કરીને ભાગીદારી તોડી. થોડા સમય બાદ મુથુસામીએ માર્શને પણ પેવેલિયન મોકલી દીધો.
બીજી સૌથી ઝડપી સદી
બાદમાં ગ્રીને દક્ષિણ આફ્રિકાના બોલરોને બરબાદ કર્યા. તેમને એલેક્સ કેરી (50)નો સારો સાથ મળ્યો. બંનેએ ત્રીજી વિકેટ માટે 164 રનની અતૂટ ભાગીદારી કરી. આ દરમિયાન ગ્રીને પોતાની કારકિર્દીની પહેલી સદી પૂરી કરી.
તેમણે 47 બોલમાં સદી પૂરી કરી. મેક્સવેલ (2023 વિરુદ્ધ નેધરલેન્ડ્સ 40 બોલ) પછી ઓસ્ટ્રેલિયા તરફથી આ બીજી સૌથી ઝડપી સદી છે. તેમણે 55 બોલ સામે આઠ છક્કા અને પાંચ ચોક્કા ફટકાર્યા હતા.
વિશાળ લક્ષ્ય હાંસલ કરવા ઉતરેલી દક્ષિણ આફ્રિકાની ટીમ કોનોલી (22/5) ના બોલ પર 24.5 ઓવરમાં 155 રનમાં ઓલઆઉટ થઈ ગઈ. ઝેવિયર બાર્ટલેટ અને સીન એબોટે પણ બે-બે વિકેટ લીધી.
દસ વર્ષ પછી ટોચના ત્રણ બેટ્સમેનોની સદીઓ
છેલ્લા દસ વર્ષમાં આ પહેલી વાર છે અને ODI ક્રિકેટમાં બીજી વાર છે જ્યારે ટોચના ત્રણ બેટ્સમેનોએ એક મેચમાં સદી ફટકારી છે. આ પહેલા 2015માં દક્ષિણ આફ્રિકાએ વેસ્ટ ઈન્ડિઝ સામે આ સિદ્ધિ મેળવી હતી.
