Ahmedabad,તા.૧૭
Ahmedabad શહેરના પૂર્વ વિસ્તારમાં મ્યુલ એકાઉન્ટના કથિત મોટા કૌભાંડનો પર્દાફાશ થતાં તપાસ એજન્સીઓ સક્રિય બની છે. બાપુનગર પોલીસ હાલ સમગ્ર કેસની ઊંડાણપૂર્વક તપાસ કરી રહી છે અને મુખ્ય સૂત્રધાર તરીકે ચર્ચામાં આવેલા વરુણ સિદ્ધાર્થ વર્માની શોધખોળ તેજ કરવામાં આવી છે. પ્રાથમિક તપાસ દરમિયાન સામે આવેલા તથ્યોના આધારે માત્ર સ્થાનિક પોલીસ જ નહીં, પરંતુ રાજ્ય સ્તરની એજન્સીઓ પણ તપાસમાં જોડાઈ હોવાનું જાણવા મળી રહ્યું છે.
આ સમગ્ર મામલો ડ્રાઇવર રવિ દ્વારા નોંધાવવામાં આવેલી ફરિયાદ બાદ સામે આવ્યો હોવાનું પોલીસ સૂત્રો જણાવી રહ્યા છે. ફરિયાદના આધારે તપાસ શરૂ થતાં કરોડો રૂપિયાના નાણાકીય વ્યવહારો, મ્યુલ એકાઉન્ટના ઉપયોગ અને વિવિધ ગેરકાયદેસર પ્રવૃત્તિઓ સાથે સંકળાયેલા સંભવિત નેટવર્ક અંગે તપાસ આગળ વધી રહી છે. તપાસમાં એવી આશંકા વ્યક્ત કરવામાં આવી રહી છે કે ગેંગ દ્વારા ૭૫થી વધુ મ્યુલ એકાઉન્ટ ખોલવામાં આવ્યા હોઈ શકે છે. પોલીસ વિવિધ બેંક ખાતાઓ, નાણાકીય લેવડદેવડ અને ડિજિટલ ટ્રાન્ઝેક્શનની વિગતો એકત્રિત કરી રહી છે. પ્રાથમિક તપાસ મુજબ આ એકાઉન્ટનો ઉપયોગ હવાલા, ઓનલાઈન ગેમિંગ, ક્રિકેટ સટ્ટા અને સાયબર ફ્રોડથી મળતા નાણાંની હેરફેર માટે થયો હોવાની સંભાવના પર તપાસ ચાલી રહી છે.
આ કેસમાં દેવાંગ શ્રીમાળી, સન્ની રાય અને જયદીપ આહીર ઉર્ફે કટોરીના નામ પણ તપાસ દરમિયાન સામે આવ્યા હોવાનું ચર્ચાઈ રહ્યું છે. બીજી તરફ પોલીસે ગેંગ સાથે સંકળાયેલા હોવાનું માનવામાં આવતા આરોપી ક્રિષ્ના પેન્ટાની ધરપકડ કરી વધુ પૂછપરછ શરૂ કરી છે. તપાસ દરમિયાન મળતી માહિતીના આધારે અન્ય સંભવિત સંડોવાયેલા લોકો સુધી પહોંચવાના પ્રયાસો ચાલી રહ્યા છે.
પોલીસ વિવિધ એંગલથી તપાસ આગળ ધપાવી રહી છે. સુરતના કુખ્યાત ચિરાગ ગોટીની કાર્યપદ્ધતિ જેવી રીત અપનાવી સ્થાનિક સ્તરે પ્રભાવ ઉભો કરવાની કોઈ કોશિશ થઈ હતી કે કેમ તે મુદ્દે પણ તપાસ થઈ રહી છે. સાથે જ પાલડી એટીએસમાં નોંધાયેલા સોના અને રોકડ સંબંધિત કેસના કેટલાક આરોપીઓ સાથે કોઈ કડી જોડાય છે કે નહીં તે પણ તપાસનો મહત્વનો ભાગ બન્યો છે. તપાસ દરમિયાન મેઘ શાહ અને મહેન્દ્ર શાહ સાથે સંભવિત સાંઠગાંઠની શક્યતા અંગે પણ માહિતી એકત્રિત કરવામાં આવી રહી છે. ઉપરાંત અપહરણ, ગેરકાયદેસર રીતે બંધક બનાવી ખંડણી વસૂલવાના ગંભીર આરોપો તથા રાણીપ વિસ્તારમાં નોંધાયેલા અપહરણ અને કરોડોના સોના સંબંધિત કેસ સાથે કોઈ સંબંધ છે કે નહીં તેની પણ તપાસ કરવામાં આવી રહી છે.
પોલીસને એવી પણ શંકા છે કે આ ગેંગ આર્થિક રીતે નબળા લોકો અને જરૂરિયાતમંદોને કમિશન અથવા પૈસાની લાલચ આપી તેમના નામે બેંક ખાતા ખોલાવતી હતી. ત્યારબાદ આ ખાતાઓનો ઉપયોગ સાયબર ફ્રોડ અને અન્ય ગેરકાયદેસર નાણાકીય વ્યવહારો માટે થતો હોવાની શક્યતા પર તપાસ કેન્દ્રિત કરવામાં આવી છે.તપાસમાં એક રાજકીય એંગલ પણ સામે આવ્યો છે. કોંગ્રેસના એક કોર્પોરેટરના સગા સાથે કથિત ભાગીદારી અથવા સંબંધ હોવાના આરોપોની પણ ચકાસણી થઈ રહી છે. ઉપરાંત બે વર્ષ અગાઉ થયેલી કથિત બેઠક અને સમાધાનના મુદ્દે પણ તપાસ કરવામાં આવી રહી હોવાનું સૂત્રો જણાવી રહ્યા છે. હાલ સમગ્ર કેસમાં સૌથી મોટો પ્રશ્ન એ છે કે મુખ્ય સૂત્રધાર તરીકે ચર્ચામાં રહેલા વરુણ સિદ્ધાર્થ વર્મા સુધી પોલીસ ક્યારે પહોંચશે અને શું આ સમગ્ર હવાલા, મ્યુલ એકાઉન્ટ અને સાયબર ફ્રોડના નેટવર્કનો સંપૂર્ણ પર્દાફાશ થશે. પોલીસનું કહેવું છે કે તપાસ હજુ ચાલુ છે અને તમામ પાસાઓની ચકાસણી બાદ જ આગળની કાયદેસરની કાર્યવાહી કરવામાં આવશે.
