Gondal તા.2
ગોંડલ-રાજકોટ નેશનલ હાઇવે જે અવારનવાર જીવલેણ અકસ્માતોને કારણે કુખ્યાત બન્યો છે, ત્યાં આજે ફરી એક કણ ઘટના બની હતી. ભરૂડી ગામના પાટિયા નજીક એક એસ.ટી. બસે બાઈક ચાલકને હડફેટે લેતા બાઈક સવારનું ઘટનાસ્થળે જ કમકમાટીભર્યું મોત નીપજ્યું હતું.
અકસ્માત સર્જી એસ.ટી. બસનો ચાલક ઘટનાસ્થળેથી ફરાર થઈ ગયો હતો. આ ઘટનામાં મૃતક બાઈક ચાલક હેલ્મેટ પહેરીને સાવચેતીપૂર્વક રોડની સાઈડમાં પોતાનું બાઈક ચલાવી રહ્યો હતો. તે દરમિયાન, મેંદરડા-જુનાગઢ-રાજકોટ રૂટની જીજે 18ઝેડટી 1941 નંબરની એસ.ટી. બસના ચાલકે બેફિકરાઈથી બસ ચલાવી બાઈકને જોરદાર ટક્કર મારી હતી. ટક્કર એટલી ભયાનક હતી કે બાઈક સવારના માથા પરથી બસનું ટાયર ફરી વળ્યું હતું, જેના કારણે તેનું તત્કાળ મૃત્યુ થયું હતું.
અકસ્માતને પગલે હાઇવે પર લોકોના ટોળેટોળા એકઠા થઈ ગયા હતા અને ટ્રાફિક જામના દ્રશ્યો સર્જાયા હતા. ઘટનાની જાણ થતાં સ્થાનિક પોલીસ કાફલો ઘટનાસ્થળે દોડી આવ્યો હતો અને મૃતદેહને પોસ્ટમોર્ટમ અર્થે ખસેડવાની કામગીરી હાથ ધરી હતી ફરાર બસ ચાલકની શોધખોળ માટેના ચક્રો ગતિમાન કર્યા હતા. આ બનાવને પગલે મૃતકના પરિવારમાં અને સમગ્ર પંથકમાં શોકની લાગણી ફેલાઈ ગઈ છે.
આ બનાવમાં જીજે03એમએસ 8569 નંબરનું બાઇક સવાર પીપળીયા પાસે સિગ્નલ નામની કંપનીમાં કામ કરતો હતો. બાઇક સવાર ગોંડલ થી અપડાઉન કરે છે. 108 એમ્બ્યુલન્સ ઘટના સ્થળે પોહચી હતી.
સ્થાનિક લોકોએ મૃતકના પહેરવેશ જે કંપનીનો પહેર્યો હતો હતો કંપની માં પણ જાણ કરી હતી અને ખિસ્સામાંથી લાઇસન્સ નીકળ્યું હતું જેમાં ભાવિક લશકરીયા રહે ગોંડલ શહેરમાં ભોજરાજપરા નરશીમંદિર પાસે ઉ.વ. આશરે 27 હોવાનું જાણવા મળ્યું છે.
