બોલિવૂડે સાઉથ પાસેથી શું શીખવું જોઈએ તે પ્રશ્નના જવાબમાં કાજલે સ્પષ્ટ કહ્યું કે સમયપાલન સૌથી મોટો પાઠ છે
Mumbai, તા.૨૩
લગભગ બે દાયકાથી સાઉથની ફિલ્મ ઇન્ડસ્ટ્રીમાં અને હિન્દી ફિલ્મ ઇન્ડસ્ટ્રીમાં સફળ કારકિર્દી બનાવનાર અભિનેત્રી કાજલ અગ્રવાલે તાજેતરમાં બંને ઇન્ડસ્ટ્રી વચ્ચેનાં તફાવત અંગે વાત કરી છે. તેણે જણાવ્યું કે બોલિવૂડે સાઉથ ફિલ્મ ઇન્ડસ્ટ્રી પાસેથી સૌથી મહત્વની બાબત એટલે કે સમયપાલન શીખવાની જરૂર છે. સાથે જ તેણે ખુલાસો કર્યો કે શૂટિંગ દરમિયાન સૌથી વધુ સમય માટે તેને સલમાન ખાન માટે રાહ જોવી પડી હતી.ઇન્ટરવ્યુ દરમિયાન કાજલે જણાવ્યું કે તેણે બોલિવૂડ કરતાં સાઉથ સિનેમાને વધુ પ્રાથમિકતા આપી કારણ કે ત્યાં તેને વધુ મજબૂત અને અર્થપૂર્ણ પાત્રો મળતાં હતાં. તેણે કહ્યું કે, “હિન્દી ફિલ્મોમાં મને જે પ્રકારના રોલ મળતા હતા, તેની સરખામણીમાં સાઉથમાં ઘણી સારી ઓફર્સ આવતી હતી. હું જે પ્રકારના પાત્રો કરવા માંગતી હતી તે ત્યાં પૂરતા પ્રમાણમાં મળતાં હતાં, તેથી માત્ર કરવા ખાતર સામાન્ય ભૂમિકાઓ કરવા માટે બોલિવૂડમાં કામ કરવાનું મને યોગ્ય લાગતું નહોતું.”બોલિવૂડે સાઉથ પાસેથી શું શીખવું જોઈએ તે પ્રશ્નના જવાબમાં કાજલે સ્પષ્ટ કહ્યું કે સમયપાલન સૌથી મોટો પાઠ છે. તેણે જણા, “બોલિવૂડે સાઉથ પાસેથી સમયપાલન શીખવું જોઈએ. હિન્દી ફિલ્મોમાં કંઈપણ સમયસર થતું નથી, જ્યારે સાઉથમાં બધું ઘડિયાળના કાંટે ચાલે છે. હું સમયસર પહોંચવાની આદત ધરાવું છું અને મને એ જ ગમે છે. હિન્દી ફિલ્મોમાં સમયનું આયોજન ઘણીવાર ખોરવાયેલું હોય છે.”કાજલે ‘સિકંદર’ ફિલ્મમાં સલમાન ખાન સાથે કામ કરવાનો અનુભવ પણ શેર કર્યો. તેણે જણાવ્યું કે બાળપણથી જ સલમાન તેનો ક્રશ રહ્યો છે, તેથી તેની સાથે કામ કરવાની ખૂબ ઉત્સુકતા હતી.પરંતુ તેણે હસતાં કહ્યું, “મારે સૌથી વધુ લાંબી રાહ સલમાન ખાન માટે જોવી પડી હતી અને મને એવી આદત નહોતી. હું વિચારતી હતી કે આખરે શું થઈ રહ્યું છે. તેઓ બપોરે અથવા સાંજના સમયે સેટ પર આવતા. ત્યાં સુધી હું સેટ પર આવેલા જિમમાં જઈને કસરત કરતી હતી. મને તો સાઉથ ઇન્ડસ્ટ્રીનાં સમયપાલન અને શિસ્તની આદત છે.” કાજલે જણાવ્યું કે દક્ષિણ ભારતીય ફિલ્મો હવે ઝડપથી બદલાઈ રહી છે. હવે મહિલા કેન્દ્રિત અને આધુનિક વિચારસરણી ધરાવતી વાર્તાઓ વધુ બની રહી છે. તેણે કહ્યું કે હવે સાઉથ સિનેમા માત્ર અભિનેત્રીઓના ગ્લેમર પર આધારિત નથી અને મહિલા પાત્રોને વધુ મજબુત રીતે રજૂ કરવામાં આવી રહ્યાં છે.તે હવે ચેત્તન ડીકે દિગ્દર્શિત ‘ધ ઇન્ડિયા સ્ટોરી’માં શ્રેયસ તળપદે સાથે જોવા મળશે. ઝી સ્ટુડિયો પર આવનારી આ ફિલ્મ ૨૪ જુલાઈએ રિલીઝ થવાની છે. આ ઉપરાંત કાજલ નિતેશ તિવારીની ફિલ્મ ‘રામાયણ’માં પણ મહત્વની ભૂમિકામાં જોવા મળશે.
