Morbi તા. 20
મોરબીના લીલાપર રોડ ઉપર કરવામાં આવેલ ગેરકાયદેસર દબાણો તોડવા માટે ગઇકાલે કમિશનરની આગેવાની હેઠળ મહાપાલિકાની ટીમ પહોંચી હતી અને ત્યાં કરવામાં આવેલ દબાણ ઉપર બુલડોઝર ફેરવીને સરકારી જમીનને ખુલ્લી કરવામાં આવી હતી તેમજ મોરબીના લીલાપર રોડ ઉપરથી રવાપર ગામ તરફ જવા માટેનો જે વજેપર પાછળનો રસ્તો છે તે ભવિષ્યમાં ડબલ પટ્ટીનો રોડ બનાવવામાં આવે તેવું હાલમાં જાણવા મળી રહ્યું છે.
મહાપાલિકા દ્વારા જુદા જુદા વિસ્તારમાં રોડ રસ્તાની આજુબાજુમાં કરવામાં આવેલા કાચા પાકા દબાણો દૂર કરવામાં આવી રહ્યા છે અને દર બુધવારે કોઈ એક વિસ્તારમાં રોડની આસપાસના દબાણ દૂર કરવામાં આવતા હોય છે ત્યારે ગઇકાલે મોરબીના લીલાપર રોડ ઉપર સ્મશાનની સામેના ભાગમાં જે ગેરકાયદે દબાણો કરવામાં આવ્યા હતા ત્યાં મહાપાલિકાના કમિશનર સ્વપ્નિલ ખરેની આગેવાની હેઠળ સમગ્ર ટીમ પહોચી હતી. અને બે બુલડોઝર સાથે ગેરકાયદેસર દબાણો તોડી પાડવા માટેની કામગીરી હાથ ધરવામાં આવી હતી.
લીલાપર રોડે છેલ્લા ઘણા સમયથી ગેરકાયદે રીતે ખડકી દેવામાં આવેલ દબાણ ઉપર સરકારી બુલડોઝર ફેરવીને તમામ દબાણોને દૂર કરવામાં આવ્યા હતા. લીલાપર રોડ ઉપરથી વજેપર પાછળ થઈને રવાપર ગામ તરફ જવા માટેનો જે રસ્તો પસાર થાય છે તે રસ્તો ભવિષ્યમાં પહોળો બનાવવામાં આવે તેવું હાલમાં અધિકારી સૂત્ર પાસેથી જાણવા મળી રહ્યું છે.
આવી જ રીતે શહેરના જુદા જુદા વિસ્તારોમાં જે કોઈપણ રોડ સાઈડના દબાણો હશે તે તમામ દબાણોને તોડી પાડવા માટેની કામગીરી કરવામાં આવશે અને ત્યારબાદ જુદી જુદી સોસાયટીઓમાં આવેલા કોમન પ્લોટ અને સરકારી જમીન ઉપર જે દબાણ હશે તેના ઉપર પણ મહાપાલિકાની ટીમ દ્વારા બુલડોઝર ફેરવીને દબાણો તોડી પાડવામાં આવશે.
