ચીનમાં જન્મદર ઘટી રહ્યો છે ત્યારે આગામી સમયમાં વસતી વિષયક કટોકટીને અટકાવવા ઘણી પોલિસી તૈયાર કરવામાં આવી છે
China, તા.૩૦
ચીને બાળકોના જન્મદરમાં વધારો કરવા માટે નવા પગલાં જાહેર કર્યા છે. જેમાં બાળજન્મ સબસિડી સિસ્ટમ અને દંપતિ માટે કરરાહતનો પણ સમાવેશ થાય છે. ચીનમાં જન્મદર ઘટી રહ્યો છે ત્યારે આગામી સમયમાં વસતી વિષયક કટોકટીને અટકાવવા ઘણી પોલિસી તૈયાર કરવામાં આવી છે.ચીનની સ્ટેટ કાઉન્સિલ અથવા સેન્ટ્રલ કેબિનેટે સોમવારે ૧૩ ટાર્ગેટેડ પગલાં માટે નિર્દેશ જાહેર કર્યો હતો. જેમાં બાળજન્મને પ્રોત્સાહન આપતી સેવાઓ વધારવા, ચાઇલ્ડકેર સિસ્ટમના વિસ્તરણ, શિક્ષણ સંબંધી સહાયમાં વૃદ્ધિ, રહેઠાણ અને રોજગારી સહિતની બાબતોનો સમાવેશ થાય છે. ઉલ્લેખનીય છે કે, ઘટી રહેલા જન્મદરને કારણે ભારત ગયા વર્ષે ચીનને ‘ઓવરટેક’ કરી દુનિયામાં સૌથી વધુ વસતી ધરાવતો દેશ બન્યો હતો. તાજેતરના પગલાંમાં ચીને બાળજન્મ સબિસિડી સિસ્ટમ અને બાળકના જન્મ સંબંધી વ્યક્તિગત આવકમાં કરરાહત સામેલ છે. પોલિસીની મહત્વની જોગવાઇઓમાં હંગામી રોજગારી કરતા લોકોન અને ગ્રામીણ પરપ્રાંતીય શ્રમિકોને મેટરનિટી ઇન્શ્યોરન્સ સ્કીમનો લાભ આપવાનો સમાવેશ થાય છે. સત્તાવાર મીડિયાના જણાવ્યા અનુસાર આવા પગલાંનો હેતુ નવા માતાપિતાને કામ ન કરતા હોય ત્યારે વધુ સુરક્ષાનો અહેસાસ કરાવવાનો છે. ચીને સ્થાનિક ઓથોરિટીને મેટરનિટી, પેટરનિટી અને ચાઇલ્ડકેર રજા માટેની પોલિસીના અમલ માટે વિનંતી કરી છે.નવા પગલાંને લોકોનો ઠંડો પ્રતિસાદ મળ્યો હોવાનું જણાય છે. માઇક્રોબ્લોગિંગ પ્લેટફોર્મ વીબો પર એક યુઝરે કોમેન્ટ કરી હતી કે, “આ પગલાં એવા છે કે, તમે ફરારી ખરીદશો તો સરકાર તમને ૧૦૦ યુઆનની એક કુપન આપશે.” ૧.૪ અબજની વસતી ધરાવતું ચીન અત્યારે ઝડપથી વૃદ્ધ થઇ રહેલી વસતીની સમસ્યાનો સામનો કરી રહ્યું છે. દેશની કુલ વસતીમાં ૬૫ વર્ષથી વધુ વયના લોકોનો હિસ્સો ૧૪ ટકા છે. વિવિધ અંદાજ પ્રમાણે ચીનમાં ૬૦ વર્ષ કે વધુ વયના લોકોની સંખ્યા ૨૦૩૫માં ૪૦ કરોડ અને ૨૦૫૦માં ૫૦ કરોડને વટાવશે.
