નવીદિલ્હી,તા.૩૧
વૈશ્વિક સ્તરે આતંકવાદ સામે ભારતના કડક વલણ અને પાકિસ્તાનને ખુલ્લા પાડવાના પ્રયાસોને નોંધપાત્ર સફળતા મળી છે. કોંગ્રેસ નેતા શશી થરૂરના નેતૃત્વમાં સર્વપક્ષીય સંસદીય પ્રતિનિધિમંડળે કોલંબિયામાં પાકિસ્તાનનો પર્દાફાશ કર્યો. કોલંબિયાએ અગાઉ પોતાના નિવેદનમાં પાકિસ્તાનમાં થયેલા જાનહાનિ પર સહાનુભૂતિ વ્યક્ત કરી હતી, પરંતુ શશિ થરૂરે વાંધો ઉઠાવ્યા બાદ તેણે પોતાનું નિવેદન પાછું ખેંચી લીધું છે.
કોંગ્રેસના સાંસદ શશિ થરૂરે બોગોટામાં એક પ્રેસ કોન્ફરન્સ દરમિયાન કોલંબિયાની પરિસ્થિતિ પર અસંતોષ વ્યક્ત કર્યો હતો. તેમણે કહ્યું હતું કે કોલંબિયા સરકારે પાકિસ્તાનમાં થયેલા નુકસાન પર શોક વ્યક્ત કર્યો તે ભારતને નિરાશ કરે છે, જ્યારે પહેલગામ આતંકવાદી હુમલાના પીડિતો પ્રત્યે સહાનુભૂતિ વ્યક્ત કરવી જોઈતી હતી.
શશી થરૂરે કહ્યું કે કોલંબિયા સરકારના પ્રતિભાવથી અમે થોડા નિરાશ છીએ, જેણે આતંકવાદના પીડિતો પ્રત્યે સહાનુભૂતિ દર્શાવવાને બદલે ભારતીય હુમલાઓ પછી પાકિસ્તાનમાં થયેલા જાનહાનિ પર હૃદયપૂર્વક શોક વ્યક્ત કર્યો હતો. તેમણે વધુમાં કહ્યું કે અમે અમારા કોલંબિયાના મિત્રોને કહેવા માંગીએ છીએ કે આતંકવાદ ફેલાવનારાઓ અને તેમની સામે લડનારાઓ વચ્ચે કોઈ સમાનતા હોઈ શકે નહીં. અમે ફક્ત સ્વ-બચાવના અધિકારનો ઉપયોગ કરી રહ્યા છીએ અને જો આ મુદ્દા પર કોઈ ગેરસમજ છે, તો અમે તેને દૂર કરવા માટે અહીં છીએ.
ભારતીય પ્રતિનિધિમંડળે કોલંબિયાના નાયબ વિદેશ પ્રધાન રોઝા યોલાન્ડા વિલાવિસેન્સિયોને ભારતનું વલણ સમજાવ્યું. આ પછી, કોલંબિયાએ પાકિસ્તાનના સમર્થનમાં પોતાનું નિવેદન પાછું ખેંચી લીધું. ભારતની સ્થિતિ સમજવા માટે કોલંબિયાના વલણની પ્રશંસા કરતા, થરૂરે કહ્યું કે નાયબ વિદેશ મંત્રીએ ખૂબ જ સુંદરતાથી કહ્યું કે તેમણે તે નિવેદન પાછું ખેંચી લીધું છે જેના વિશે અમે ચિંતિત હતા, અને હવે તેઓ અમારી સ્થિતિને સંપૂર્ણપણે સમજે છે, જેને અમે ખૂબ મહત્વ આપીએ છીએ.
થરૂરે ટ્વીટ કર્યું, આજની શરૂઆત નાયબ વિદેશ મંત્રી રોઝા યોલાન્ડા વિલાવિસેન્સિયો અને એશિયા-પેસિફિક બાબતો સાથે કામ કરતા તેમના વરિષ્ઠ સાથીદારો સાથેની ઉત્તમ બેઠકથી થઈ. મેં તાજેતરની ઘટનાઓ પર ભારતનો દૃષ્ટિકોણ સ્પષ્ટ કર્યો અને ૮ મેના રોજ પાકિસ્તાન પ્રત્યે ‘સંવેદના’ વ્યક્ત કરતા નિવેદન પર નિરાશા વ્યક્ત કરી. મંત્રીએ ખાતરી આપી કે નિવેદન પાછું ખેંચી લેવામાં આવ્યું છે અને હવે ભારતની સ્થિતિ યોગ્ય રીતે સમજી શકાય છે અને મજબૂત સમર્થન આપવામાં આવ્યું છે.
કોલંબિયા કોંગ્રેસ (નેશનલ એસેમ્બલી) ખાતે ચેમ્બર ઓફ રિપ્રેઝન્ટેટિવ્સના બીજા કમિશન (આપણી વિદેશ બાબતો સમિતિની સમકક્ષ) ના પ્રમુખ એલેજાન્ડ્રો ટોરો અને ચેમ્બર ઓફના પ્રમુખ જેમે રાઉલ સલામાન્કા સાથે સમાન હકારાત્મક બેઠક થઈ
અમે બ્રિકસ સાથેના અમારા સંબંધોને ખૂબ મહત્વ આપીએ છીએ, જેના અમે સ્થાપક સભ્ય છીએ. અમે ગ્લોબલ સાઉથ વિકાસશીલ વિશ્વના દેશોના વિકાસમાં પણ ખૂબ જ સામેલ છીએ. કોલંબિયા અને ભારત બંને ગ્લોબલ સાઉથના સભ્યો છે અને જ્યાં સુધી ભારતનો સંબંધ છે, અમે વિકાસ અને પ્રગતિના સાહસ પર સાથે આગળ વધવાનું પસંદ કરીશું.
