New Delhi, તા.15
ભારતીય ટીમે વેસ્ટ ઇન્ડીઝ સામે બીજી ટેસ્ટ જીતી હોવા છતાં, ટીમ મેનેજમેન્ટ ફિરોઝ શાહ કોટલાની પિચથી ખુશ નથી. ભારતે પાંચમા દિવસે વેસ્ટ ઇન્ડીઝને સાત વિકેટથી હરાવીને બે મેચની ટેસ્ટ શ્રેણી 2-0થી જીતી લીધી.
ભારત હવે નવેમ્બરમાં કોલકાતા અને ગુવાહાટીમાં દક્ષિણ આફ્રિકા સામે ટેસ્ટ મેચ રમશે. આ મેચોમાં, ટીમ મેનેજમેન્ટ એવી પિચ ઇચ્છશે જે જસપ્રીત બુમરાહ અને મોહમ્મદ સિરાજ જેવા મુખ્ય ઝડપી બોલરો માટે વધુ અસરકારક હોય, ભલે દક્ષિણ આફ્રિકા પાસે કાગીસો રબાડા જેવો વિશ્વસ્તરીય બોલર હોય.
ભારત અને દક્ષિણ આફ્રિકા વચ્ચેની શ્રેણી 14 નવેમ્બરથી શરૂ થશે. મુખ્ય કોચ ગૌતમ ગંભીરે પિચ પ્રત્યે નિરાશા વ્યક્ત કરતા કહ્યું કે તે મધ્યમ ગતિ બોલરો અને આંગળી સ્પિનરોને કોઈ મદદ કરતી નથી.
મેચ પછી, ગંભીરે કહ્યું, “માંરુ માનવું છે કે અમારી પાસે અહીં વધુ સારી પિચ હોઈ શકી હોત. અમને પાંચમા દિવસે પરિણામ મળ્યું, પરંતુ મને લાગે છે કે બોલ ધાર લઈને વિકેટકીપર અથવા સ્લિપ ફિલ્ડરો સુધી પહોંચવો જોઈતો હતો.”
અરુણ જેટલી સ્ટેડિયમની પિચ સ્પિનરો માટે મદદરૂપ છે પરંતુ રવિન્દ્ર જાડેજા અને વોશિંગ્ટન સુંદરને તેમાંથી કોઈ મદદ મળી ન હતી. બેટ્સમેન બેકફૂટની મદદથી સ્પિનરોના ધીમા બોલને સરળતાથી રમી રહ્યા હતા.
ગંભીરે બુમરાહ અને સિરાજના મહત્વ પર ભાર મૂક્યો અને કહ્યું, “મને ખબર છે કે આપણે સ્પિનરોની મહત્વપૂર્ણ ભૂમિકા વિશે વાત કરતા રહીએ છીએ, પરંતુ જ્યારે તમારી પાસે બે મહાન ઝડપી બોલરો હોય છે, ત્યારે તમે ઇચ્છો છો કે તેઓ મેચમાં મહત્વપૂર્ણ યોગદાન આપે.
પિચમાં થોડી ગતિ અને ઉછાળો હોવો જોઈએ. પરંતુ અહીંની પિચમાં એવું કંઈ નહોતું, તે નિરાશાજનક છે. આપણે ભવિષ્યમાં વધુ સારી પિચનો ઉપયોગ કરી શકીએ છીએ કારણ કે ટેસ્ટ ક્રિકેટને બચાવવાની જવાબદારી આપણા બધાની છે.”
