Mumbai,તા.૧૩
નિર્માતા-દિગ્દર્શક રામ ગોપાલ વર્મા આંધ્ર પ્રદેશના મુખ્યમંત્રી એન ચંદ્રબાબુ નાયડુના ફોટા સાથે છેડછાડ કરવાના કેસમાં મંગળવારે આંધ્ર પ્રદેશ પોલીસ સમક્ષ હાજર થયા. રામ ગોપાલ પર સોશિયલ મીડિયા પર મુખ્યમંત્રી નાયડુના મોર્ફ કરેલા ફોટા શેર કરવાનો આરોપ છે.
તમને જણાવી દઈએ કે ૧૧ નવેમ્બર, ૨૦૨૪ ના રોજ પ્રકાશમ જિલ્લાના મદ્દીપાડુ પોલીસ સ્ટેશનમાં સીએમ નાયડુ, નાયબ મુખ્યમંત્રી પવન કલ્યાણ અને તેમના પરિવારના સભ્યોના મોર્ફ કરેલા ફોટા સોશિયલ મીડિયા પર પોસ્ટ કરવા બદલ ડિરેક્ટર સામે કેસ નોંધવામાં આવ્યો હતો.
પ્રકાસમ જિલ્લા પોલીસ અધિક્ષક (એસપી) એઆર દામોદરે સમાચાર એજન્સી પીટીઆઈને જણાવ્યું હતું કે, ’અમે એક પ્રશ્નાવલી આપી હતી અને તેમને પૂછ્યું હતું કે ચિત્રો સાથે કોણે છેડછાડ કરી છે અને આ કામ કોના નિર્દેશ પર કરવામાં આવ્યું છે’? તેમણે કહ્યું કે રામ ગોપાલ વર્માને સીએમ નાયડુ, પવન કલ્યાણ અને અન્ય લોકોનું અપમાન કરવાના કારણો વિશે પૂછપરછ કરવામાં આવી હતી અને એ પણ પૂછવામાં આવ્યું હતું કે શું તેમનો તેમની સાથે પહેલા કોઈ વિવાદ હતો?
નવેમ્બર ૨૦૨૪ માં કેસ શરૂ થયા પછી રામ ગોપાલ વર્માને બોલાવવામાં મહિનાઓના વિલંબ વિશે પૂછવામાં આવતા, એસપી દામોદરે કહ્યું કે તેમને જરૂરિયાત મુજબ બોલાવવામાં આવશે અને તેમને બોલાવવા પર કોઈ પ્રતિબંધ નથી. દરમિયાન, એક પોલીસ અધિકારીએ જણાવ્યું હતું કે વર્માની પૂછપરછ આજે સવારે ૧૧ વાગ્યે શરૂ થઈ હતી અને આખો દિવસ ચાલુ રહી હતી.
મદ્દીપાડુના રામલિંગમ (૪૫) તરફથી મળેલી ફરિયાદના આધારે રામ ગોપાલ વર્મા સામે વિવિધ કલમો હેઠળ કેસ નોંધવામાં આવ્યો હતો. આમાં, તેમણે રામ ગોપાલ વર્મા પર નાયડુ અને તેમના પરિવાર, જેમાં તેમના પુત્ર લોકેશ અને પુત્રવધૂ બ્રહ્માણીનો સમાવેશ થાય છે, વિરુદ્ધ અપમાનજનક સામગ્રી ફેલાવવા માટે સોશિયલ મીડિયાનો ઉપયોગ કરવાનો આરોપ મૂક્યો હતો.
