New Delhiતા.22
કેરળમાં પ્રસ્તાવિત સ્પેશિયલ ઇન્ટેન્સિવ રિવિઝન પ્રક્રિયા પર રોક લગાવવાની માંગ કરતી અરજી પર સુપ્રીમ કોર્ટે ચૂંટણી પંચને નોટિસ જારી કરીને જવાબ માંગ્યો છે. આ કેસમાં આગામી સુનાવણી હવે ૨૬ નવેમ્બરે થશે. રાજ્ય સરકારે અરજીમાં માંગ કરી છે કે સ્થાનિક સ્વરાજ્યની ચૂંટણીઓ પૂર્ણ થાય ત્યાં સુધી એસઆઇઆર મુલતવી રાખવામાં આવે. રાજ્ય સરકારની સાથે, ઇન્ડિયન યુનિયન મુસ્લિમ લીગએ પણ સુપ્રીમ કોર્ટમાં એસઆઇઆર પ્રક્રિયાને તાત્કાલિક રોકવા માટે અરજી દાખલ કરી છે. બંને અરજીઓમાં મુખ્ય દલીલ એ છે કે એસઆઇઆર અને સ્થાનિક સ્વરાજ્યની ચૂંટણીઓ એકસાથે યોજવી વહીવટી રીતે અશક્ય છે અને મતદારોના અધિકારોનું ઉલ્લંઘન કરશે.
કેરળ સરકારની અરજી કલમ ૩૨ હેઠળ દાખલ કરવામાં આવી છે. તેમાં જણાવાયું છે કે રાજ્યમાં ૧,૨૦૦ સ્થાનિક સ્વરાજ્ય સંસ્થાઓ છે, જેમાં ૯૪૧ ગ્રામ પંચાયતો, ૧૫૨ બ્લોક પંચાયતો, ૧૪ જિલ્લા પંચાયતો, ૮૭ નગરપાલિકાઓ અને ૬ કોર્પોરેશનોનો સમાવેશ થાય છે. આ ૨૩,૬૧૨ વોર્ડ માટે ચૂંટણી ૯ અને ૧૧ ડિસેમ્બરે બે તબક્કામાં યોજાવાની છે, અને મતગણતરી ૧૩ ડિસેમ્બરે થશે.
એસઆઇઆર પ્રક્રિયા ૪ નવેમ્બરે શરૂ થઈ છે, અને ડ્રાફ્ટ મતદાર યાદી ૪ ડિસેમ્બરે પ્રકાશિત થવાની છે. અરજીમાં દલીલ કરવામાં આવી હતી કે આ ચૂંટણીઓ માટે ૧૭૬,૦૦૦ કર્મચારીઓ અને ૬૮,૦૦૦ સુરક્ષા દળોની જરૂર છે, જ્યારે એસઆઇઆરને વધારાના ૨૫,૬૬૮ કર્મચારીઓની જરૂર છે. આનાથી વહીવટી તંત્ર પર ભારે ભારણ પડશે અને સામાન્ય શાસન ખોરવાઈ જશે. અરજીમાં ચૂંટણી પંચને ચૂંટણી પ્રક્રિયા પૂર્ણ થાય ત્યાં સુધી એસઆઇઆર મુલતવી રાખવા વિનંતી કરવામાં આવી છે, કારણ કે તે કોઈને નુકસાન પહોંચાડશે નહીં. રાજ્ય સરકારે સ્પષ્ટતા કરી છે કે તે પછીથી એસઆઇઆરની માન્યતા પર પ્રશ્ન ઉઠાવી શકે છે, પરંતુ હાલમાં ફક્ત મુલતવી રાખવાની માંગ કરી રહી છે.
આ દરમિયાન, ઉત્તર પ્રદેશના બારાબંકીના કોંગ્રેસ સાંસદ તનુજ પુનિયાએ પણ ઉત્તર પ્રદેશમાં હાથ ધરવામાં આવી રહેલી એસઆઇઆર પ્રક્રિયાને પડકાર ફેંક્યો છે. સુપ્રીમ કોર્ટે કોંગ્રેસના સાંસદ તનુજ પુનિયાની અરજી પર ચૂંટણી પંચને નોટિસ ફટકારી છે.
