Mumbai,તા.3
શેરબજારને મંદીમાંથી છુટકારો ન હોય તેમ આજે નવા સપ્તાહના પ્રથમ દિવસે કડાકાનો દોર જારી રહ્યો હતો. સેન્સેકસ 73000ની નીચે ઉતરી ગયો હતો અને નિફટી 22000ની નજીક આવી ગયો હતો.
શેરબજારમાં આજે શરૂઆત પોઝીટીવ ટોને થઈ હતી. ભારતના જીડીપી આંકડા પોઝીટીવ આવતા, જીએસટી આવકમાં વધારો, અર્થતંત્ર ચાર ટ્રીલીયન ડોલરને આંબી જવાના સંકેત સહિતના કારણોથી ઉઘડતામાં માર્કેટ ગ્રીનઝોનમાં હતું. પરંતુ દરેક ઉછાળે વેચવાલીનો મારો આવી જતો હોય તેમ થોડા સમયમાં જ માર્કેટ મંદીમાં ધસી પડયુ હતુ.
વિદેશી માર્કેટનો ટ્રેન્ડ મીશ્ર હોવાથી સાવચેતી હતી. અમેરિકી ટેરિફવોરના ભણકારા તથા વિદેશી નાણાં સંસ્થાઓની વેચવાલી જેવા કારણોનો ખચકાટ હતો. જાણીતા શેરબ્રોકરોના કહેવા પ્રમાણે ટેરિફવોર સહિતના મામલે ચિત્ર સ્પષ્ટ થતા સુધી અનિશ્ર્ચિતતાનો માહોલ યથાવત રહી શકે છે.
શેરબજારમાં આજે પણ રોકડાના શેરોમાં દબાણ વધુ હતું. ટાટા સ્ટીલ, ઝોમેટો, અદાણી પોર્ટ, એકસીસ બેંક, બજાજ ફાઈનાન્સ, એચડીએફસી બેંક, નેસલે, રીલાયન્સ, સ્ટેટ બેંક, ઈન્ડુસઈન્ડ બેંક, જીયો ફાઈનાન્સ, કોટક બેંક જેવા શેરોમાં ગાબડા હતા. ટાઈટન, અલ્ટ્રાટેક સિમેન્ટ, ભારતી એરટેલ, લાર્સન, મહીન્દ્ર, ગ્રાસીમ, વીપ્રો, એપોલો હોસ્પીટલ જેવા શેરો મજબૂત હતા.
મુંબઈ શેરબજારનો સેન્સીટીવ ઈન્ડેકસ 198 પોઈન્ટના ગાબડાથી 72999 હતો તે ઉંચામાં 73649 તથા નીચામાં 72797 હતો. નેશનલ સ્ટોક એકસચેંજનો નિફટી 45 પોઈન્ટ ગગડીને 22078 હતો તે ઉંચામાં 22261 તથા નીચામાં 22012 હતો.
