વિધાર્થી અને તેના મિત્રોને દુષ્કર્મ કેસમાં ફિટ કરવાની ધમકી આપી રૂ. 17 હજાર પડાવી લીધા’તા
Rajkot,તા.26
શહેરમાં પોલીસની ઓળખ આપી ફરતા એક બાદ એક શખ્સના કારનામા બહાર આવી રહ્યા છે ત્યારે વધુ એક આવો બનાવ સામે આવ્યો છે. પોલીસ તરીકેની ઓળખ આપી ચાર શખ્સોની ટોળકીએ છાત્ર અને તેના મિત્રો પાસેથી રૂા. 17,000 પડાવી લીધાનો ચોંકાવનારો કિસ્સો બહાર આવ્યો છે.એ ડીવીઝન પોલીસે ગુનો દાખલ કરી સમીર ઉર્ફે ઇસ્માઇલ ચાનિયા અને રોહિત રાજુભાઈ મકવાણા નામના બે શખ્સોને પકડી લઈ અન્ય બે શખ્સોની શોધખોળ શરૂ કરી છે.
ઘટનાની પ્રાપ્ત વિગત મુજબ નાના મવા મેઈન રોડ પર દેવનગર 4/66ના ખુણે રહેતા અને થોડા સમય પહેલાં જ બીબીએનો અભ્યાસ પુર્ણ કરનાર અભય અશ્વિનભાઈ મુછડીયા (ઉ.વ. 21) ગઈ તા. 19નાં રોજ રાત્રે બે મિત્રો નયન ભીખાભાઈ મકવાણા (ઉ.વ. 19, રહે, વર્ધમાન વિહાર, કણકોટ રોડ) અને ક્રીષ રતીલાલ વાઘેલા (ઉ.વ. 19, રહે, પંચરત્ન પાર્ક, કણકોટ રોડ) સાથે એક્ટીવામાં અમુલ સર્કલે આવેલી ઈન્ડાની લારીએ નાસ્તો કરી ચુનારાવાડા ચોકમાં માવો ખાવા ગયો હતો.
જયાંથી બે અજાણ્યા શખ્સોએ બાઈક ઉપર તેમનો પીછો કર્યો હતો. ભુતખાના ચોક પાસેના એચપી પેટ્રોલ પમ્પ સામેના રોડ પર બન્ને શખ્સોએ તેમને અટકાવી કહ્યું કે, તમે ત્રણ સવારીમાં કેમ છો. બાદમાં તેમના એક્ટીવાની ચાવી કાઢી લીધી હતી.
ત્યાર પછી તેમની પાસેથી રૂા. 5 લાખની માંગણી કરી હતી. પરંતુ અભય અને તેના મિત્રોએ રકમ આપવાની ના પાડતા તે શખ્સોએ કહ્યું કે, પૈસા નહી આપો તો તમને બધાને રેપ કેસમાં પોપટપરાની જેલમાં ત્રણ મહિના માટે પુરાવી દેશું, તમારે પૈસા તો આપવા જ પડશે. આ પછી ત્રણેય મિત્રોના ખીસ્સા ચેક કરવા લાગ્યા હતાં.
જેમાંથી નયનના પાકીટમાંથી રૂા. 7,000 નીકળતા તે પડાવી લીધા હતાં. આ પછી ત્રણેય મિત્રોના આધાર કાર્ડ અને ફોન પે પણ ચેક કર્યા પછી કહ્યું કે, રૂા. 10,000 તો આપવા જ પડશે. જેથી અભયે તેના મિત્ર પૃથ્વીરાજસિંહ ચૌહાણને કોલ કરી રૂા. 10,000 ઓનલાઈન મગાવ્યા હતાં. આ પછી તે શખ્સોએ કોઈની પાસેથી સ્કેનર મંગાવ્યું હતું. જેની મદદથી અભયના ખાતામાં રહેલા રૂા. 10,000 ટ્રાન્સફર કરાવ્યા હતાં. બાદમાં ચારેય શખ્સો જતા રહ્યા હતાં.આ ઘટનામાં એ ડીવીઝન પોલીસના પીએસઆઇ ડી વાય મહંત અને સ્ટાફે બે શખ્સો સમીર ઉર્ફે ઇસ્માઇલ ચાનિયા અને રોહિત રાજુભાઈ મકવાણાની ધરપકડ કરી પૂછપરછ શરૂ કરતા સમીર ગાડી લે-વેચ કરતો હોવાનું જયારે રોહિત ફેબ્રીકેશનનો ધંધાર્થી હોવાની કબૂલાત આપી હતી. તેમજ બાકીના બે શખ્સોની પણ ઓળખ થઈ જતા તેને પકડી લેવા તજવીજ શરૂ કરવામાં આવી છે.
