Gandhinagar,તા.૧૬
Gandhinagarથી મોટા સમાચાર સામે આવ્યા છે. છત્રાલ જીઆઈડીસી વિસ્તારમાં આવેલી કંપનીમાં બ્લાસ્ટ થયો છે. કંપનીમાં બોયલરની વેસલ ફાટી જતાં ચાર લોકોના મોત થયા છે. કલોલના છત્રાલ જીઆઈડીસીમાં કાપડનો રંગ બનાવતી ફેક્ટરીમાં આ દુર્ઘટના થઈ છે. જેમાં કેટલાક લોકો ઈજાગ્રસ્ત હોવાની પણ જાણકારી મળી છે.
કલોલના બિલેશ્વરપુરામાં બોયલર ફાટ્યું છે. કાપડનો રંગ બનાવતી ફેક્ટરીમાં બોયલર ફાટવાની ઘટના બની છે. જેમાં ચાર લોકોના મોત થયા છે. કલોકના ધારાસભ્ય લક્ષમણજી ઠાકોર ઘટનાસ્થળે જવા રવાના થયા છે.
ઘટનાની પ્રાથમિક માહિતી પ્રમાણે કર્મચારીઓ પોતાનું કામ કરી રહ્યાં હતા. આ દરમિયાન કેમિકલ પ્લાન્ટના રિડક્શન બોયલર વેસલમાં અચાનક પ્રેશર વધી ગયું હતું. પ્રેશર અનિયંત્રિત થવાને કારણે અચાનક બ્લાસ્ટ થયો હતો. આ બ્લાસ્ટમાં નજીક કામ કરી રહેલા ચાર પરપ્રાંતીય કામદારો હવામાં ફંગોળાઈ ગયા હતા. ઘટનાસ્થળે ચારેયના મોત થયા છે.
આ દુર્ઘટનામાં કુલ ચાર લોકોના મોત થયા છે. જેના નામ વિનોદકુમાર સિંહ, ટેડા દેહારી, લભણ મીણા, સિકંદર દેહરી હોવાનું સામે આવ્યું છે. હાલ તો તંત્રએ આ મામલે તપાસ શરૂ કરી છે.
આ ઘટનાની જાણ થતાં તાલુકા પોલીસ, ફાયર બ્રિગેડની ટીમના અધિકારીઓ ઘટનાસ્થળે પહોંચ્યા હતા. સ્થાનિક પ્રાંત અધિકારી, મામલતદાર અને એફએસએલની ટીમોએ સ્થળ પર પહોંચી અકસ્માતનું કારણ જાણવા તપાસ હાથ ધરી છે.
આ અંગે વાત કરતા કલોલ તાલુકાના પીઆઇ જે.જે. ગઢવીએ કહ્યુ કે- છત્રાલના જીઆઈડીસીમાં આવેલી કોવિકા ડાઈઝ કંપનીના કેમિકલ પ્લાન્ટમાં રિડક્શન વેસલમાં ખામી સર્જાય હતી, જેના કારણે અકસ્માત થયો છે. આ દુર્ઘટનામાં ચાર કર્મચારીઓના મોત થયા છે. તેમણે વધુમાં જણાવ્યું કે પ્રાથમિક તપાસમાં બોઈલરની સેવલમાં પ્રેશર આવવાને કારણે દુર્ઘટના સર્જાય છે. અકસ્માતનું સ્પષ્ટ કારણ એફએસએલ તપાસ બાદ સામે આવશે.
