સિક્યોરિટી ગાર્ડની સુરક્ષા વ્યવસ્થાના ધજાગરા ઉડાવી તસ્કરો ૨૨૮૧ મીટર કેબલ ઉપાડી રફૂચક્કર
Gandhinagar, તા.૨૭
રાજ્યના પાટનગર ગાંધીનગરમાં પાણી પુરવઠા બોર્ડના વાવોલ ખાતેના સ્ટોરમાંથી ૬.૨૮ લાખના કોપર કેબલની ચોરીના બનાવે ભારે ચકચાર મચાવી છે. કારણ કે આ સરકારી સ્ટોરના ગેટ અને કમ્પાઉન્ડમાં ૨૪ કલાક સિક્યુરિટી ગાર્ડ બંદોબસ્તમાં તહેનાત હોય છે, તેમ છતાં તસ્કરો ૨૨૮૧ મીટર પીવીસી કોપર કેબલ ચોરીને અંજામ આપી સરકારી સુરક્ષા વ્યવસ્થાના ધજાગરા ઉડાવી રફૂચક્કર થઇ ગયા છે. આ અંગે સેક્ટર-૭ પોલીસ સ્ટેશનમાં તસ્કર ટોળકી વિરુદ્ધ ગુનો નોંધવામાં આવ્યો છે.મળતી માહિતી મુજબ, ખ-૩ સર્કલ નજીક આવેલા વાવોલ સ્ટોર ખાતેથી બોર બનાવવામાં ઉપયોગમાં લેવાતા ૧૬ એમએમ અને ૧૦ એમએમ ડાયામીટરના પીવીસી કોપર કેબલની ચોરી થઈ છે.
સ્ટોરમાં નવો સામાન મુકાવવા ગયેલા જાહેર આરોગ્ય યાંત્રિક પેટા વિભાગના નાયબ કાર્યપાલક ઇજનેર વિપુલભાઈ પ્રજાપતિ અને સ્ટોર ઇન્ચાર્જ પૂજાબેન મોદીના ધ્યાને આવ્યું હતું કે ખુલ્લા પરિસરમાં મુકવામાં આવેલો કેબલનો જથ્થો ઓછો જણાય છે. ચોરીની શંકા જતાં સ્ટોકના લેજર રજિસ્ટર સાથે સરખામણી કરવામાં આવી ત્યારે જણાઇ આવ્યું હતું કે વર્ષ ૨૦૧૪થી લઈને ૨૦૨૨ સુધીના સમયગાળા દરમિયાન ખરીદવામાં આવેલા ૧૬ એમએમ ડાયામીટરના ૧૨૩૫ મીટર અને ૧૦ એમએમ ડાયામીટરના ૧૦૪૬ મીટર મળીને કુલ ૨૨૮૧ મીટર કોપર કેબલ ગાયબ હોવાનું સામે આવ્યું હતું. આ તમામ કેબલના જથ્થાની કુલ કિંમત ૬,૨૮,૩૧૬ થાય છે. ચોંકાવનારી બાબત એ છે કે, વાવોલ સ્ટોરની ચારેય બાજુ પાકી કમ્પાઉન્ડ વોલ આવેલી છે અને દિવસ-રાત સિક્યોરિટી ગાર્ડ પણ તૈનાત રહે છે. તેમ છતાં આટલી મોટી માત્રામાં કોપર કેબલની ચોરી થઈ જતાં સરકારી મિલકતની સુરક્ષા સામે સવાલો ઊભા થયા છે. આંતરિક તપાસ અને બિલોની મેળવણી બાદ કચેરીના ઉપરી અધિકારીઓની સૂચનાથી સેક્ટર-૭ પોલીસ સ્ટેશનમાં ફરિયાદ નોંધાવવામાં આવી છે. પોલીસે અજાણ્યા તસ્કરો વિરુદ્ધ ગુનો નોંધી આગળની કાયદેસરની તપાસ હાથ ધરી છે.
