Gondal તા.16
ગોંડલના મોટાં દડવા ગામે રહેતા પાંચ કૌટુંબીક વ્યક્તિ પર પતંગ બાબતનો ખાર રાખી વિજય, કાળુ, રઘુ,રામજી સહિતના શખ્સો ધારીયા, પાઇપ વડે તુટી પડ્યા હતા.
ઇજાગ્રસ્ત પાંચેયને રાજકોટ સિવિલ હોસ્પિટલમાં ખસેડાયા છે. જ્યાં સારવાર હેઠળ છે.
બનાવની પ્રાપ્ત વિગતો મુજબ ગોંડલના મોટા દડવા ગામે રહેતા મયુરભાઈ દાદુભાઇ સોલંકી (ઉ. વ.14), દિનેશભાઈ નરસીભાઈ સોલંકી (ઉ.વ.50), વિનુભાઈ દિનેશભાઈ સોલંકી (ઉ.વ.20), નરસિભાઈ નારણભાઈ સોલંકી (ઉ.વ.80), અરવિંદભાઈ દિનેશભાઈ સોલંકી (ઉ.વ.22) તેઓ ગઈ કાલ સાંજનાં છ વાગ્યાની આસપાસ પોતાના ઘર પાસે હતા.
ત્યારે ત્યાં વિજય, કાળુ, રઘુ, રામજી અને અજાણ્યા શખ્સો ધસી આવી ઝઘડો કરી ધારીયા, પાઇપ અને ચેનના ચક્કર વડે મારામારી કરવા લાગ્યાં હતાં. જેમાં મયુર, દિનેશભાઈ, નરશીભાઇ, વિનુભાઈ અને અરવિંદભાઈને ઈજાઓ પહોંચતા તાકિદે તેઓને જસદણ સરકારી હોસ્પિટલમાં ખસેડવામાં આવ્યા હતા.
બાદ વધુ સારવાર અર્થે રાજકોટ સિવિલ હોસ્પિટલમાં રિફર કરવામાં આવ્યા છે. અગાઉ પતંગ બાબતે માથાકૂટ થઈ હતી. જેનો ખાર રાખી હુમલો કર્યો હોવાનું જાણવા મળ્યું હતું. બનાવ અંગે આટકોટ પોલિસે ગુનો નોંધવાની તજવીજ હાથ ધરી છે.
