Gondal, તા. 18
ગોંડલ નજીક ભોજપરાની સીમમાં એક ગોડાઉનમાં રાજકોટ રૂરલ એલસીબીની ટીમે મધરાતે દારૂના કટિંગ વખતે જ દરોડો પાડ્યો હતો અને 15.80 લાખની કિંમતની 2772 દારૂની બોટલો ઝડપી લીધી હતી. અહીં મજુર તરીકે કામ કરતા કૈલાશ ખીચડ અને જલારામ ખીલેરીની ધરપકડ કરાઈ હતી. જયારે અન્ય આરોપી પ્રકાશ ઉર્ફે સત્યા બિશ્નોઈ, નારાયણસિંહ પદમસિંહની શોધખોળ હાથ ધરી હતી. ઉપરાંત જીજે -33-ટી 3346 નંબરના બોલેરો પીકઅપના માલીકની પણ શોધખોળ હાથ ધરાઈ છે.
બોલેરો, દારૂનો જથ્થો, બે મોબાઈલ ફોન સહિત રૂ.20.90 લાખનો મુદ્દામાલ જપ્ત કરી ગોંડલ તાલુકા પોલીસ મથકે ફરિયાદ નોંધાઈ છે. ચુના પાવડરના બચકાની આડમાં દારૂની પેટીઓ ગોઠવતી હતી ફક્ષય રાજકોટ – જૂનાગઢ સહિતના જિલ્લામાં સપ્લાય થતી હોવાનું અનુમાન છે.
પોલીસ ફરિયાદમાં એલ.સી.બી.એ જણાવ્યા મુજબ, એલસીબી સ્ટાફ ગોંડલ વિસ્તારમાં નાઇટ પેટ્રોલીંગમાં હતો. તે દરમિયાન રાત્રે 12.40 વાગ્યે બાતમી મળેલ કે ગોંડલ તાલુકાના ભોજપરા ગામની સીમમાં ગોંડલ રાજકોટ હાઇવે રોડ પર આવેલ ગેલેક્સી પેટ્રોલપંપ પાછળ ઇન્ડસ્ટ્રીઝ વિસ્તારમાં આવેલ શ્રી જોગમાયા ગોડાઉન નં.3 માં અમુક માણસો વિદેશી દારૂના જથ્થા ની હેરફેર-કટિંગ કરે છે. દારૂનુ કટિંગ ચાલુ છે.
તેવી હકિકત તુરંત જ બે પંચોને સાથે રાખી રાત્રે 1.10 વાગ્યે સ્થળ પર દરોડો પાડવામાં આવ્યો હતો. જ્યાં ગોડાઉનનું શટર ખુલ્લુ હોય તેમાં એક વાહન ઉભું હતું. બે ઇસમો વાહનમાં પુઠાના બોક્સ ભરતા હોવાનુ જોવામાં આવેલ. બન્ને ઇસમોને કોર્ડન કરી લેવાયા હતા. લાઇટના અજવાળામાં જોતા એક મહિન્દ્રા બોલેરો વાહનમાં તથા ગોડાઉનમાં પુઠાના બોક્સ તથા સફેદ કલરના બાચકા જોવામાં મળતા તેમાં તપાસ કરતા બોક્સમાં દારૂની બોટલો હતી અને કિસાન બ્રાન્ડ રોગો પાવડર ચુનો લખેલા બાચકામાં ચુનાનો પાઉડર ભરેલ હતો.
ગોડાઉન ખાતે હાજર શખ્સો કૈલાશ બાબુલાલ જગમાલ રામ ખીચડ (ઉ.વ.22 રહે. બાધા, બીશ્નોઈ કી ધાણી, તા. શેડવા જી.બાડમેર રાજ્ય. રાજસ્થાન હાલ. રહે. ગોંડલ ગુંદાળા રોડ એસ્ટોન સીનેમા પાસે પટેલનગર ભાડાના મકાનમા), જલારામ ભીખારામ ઉદારામ ખીલેરી (ઉ.વ.28 રહે. સોનડી તા.શેડવા જી.બાડમેર રાજ્ય. રાજસ્થાન હાલ, રહે.ગોંડલ ગુંદાળા રોડ એસ્ટોન સીનેમા પાસે પટેલનગર ભાડાના મકાનમાં)ની ધરપકડ કરાઈ હતી.
આ કામગીરી જિલ્લા નાયબ પોલીસ મહા નિરીક્ષક જયપાલસિંહ રાઠોડના માર્ગદર્શન હેઠળ રાજકોટ રૂરલ એલસીબી પીઆઇ વી.વી.ઓડેદરા, એ.એસ.આઇ. બાલકૃષ્ણભાઇ ત્રિવેદી, અમિતસિંહ જાડેજા, રોહિતભાઇ બકોત્રા, હેડ કોન્સ. અનિલભાઇ ગુજરાતી, ભગીરથસિંહ જાડેજા, વાઘાભાઇ આલ, રસીકભાઇ જમોડ, કોન્સ. મહિપાલસિંહ ચુડાસમા, ભાવેશભાઇ મકવાણા વગેરે દ્વારા કરવામાં આવી હતી.
પકડાયેલ શખ્સો મજુર છે : મહિને 30 હજાર પગાર અપાતો
પકડાયેલ આરોપીને ગોડાઉનની માલીકી તથા વિદેશી દારૂના જથ્થા બાબતે પુછપરછ કરતા ગોડાઉન પ્રકાશ ઉર્ફે સત્યા બીશ્નોઈ રહે. સાંચોર રાજ્ય.રાજસ્થાન)એ ભાડેથી રાખેલ છે અને પ્રકાશ ઉર્ફે સત્યા તેઓની અહીં દારૂની ગાડી આવે તે ખાલી કરવાનું કામ કરવા તથા દારૂની ગાડી ભરી મોકલવાનું કામ કરવા લઇ આવેલ હોવાનું જણાવેલ અને મહિને ત્રીસ હજાર રૂપિયા પગાર આપતો હોવાનુ જણાવેલ. પ્રકાશ ઉર્ફે સત્યા ફોનથી બહાર રોડેથી ગાડી લઇ આવવાનું કહેતો તે ગાડી જલારામ લઇ આવતો અને તેમાં દારૂની પેટીઓ ભરી પ્રકાશ ઉર્ફે સત્યા કહે તે જગ્યાએ અજાણ્યા માણસને દારૂની ગાડી આપી આવતો હતો.
ગોડાઉન ધવલ વીરડીયાએ રાજસ્થાનના શખ્સને ભાડે આપેલ હતું
પોલીસે ગોડાઉન માલીકનો સંપર્ક કરેલ હોય જેથી ગોડાઉન માલીક ધવલ મુકેશભાઈ વિરડીયા (રહે. ગોંડલ યોગીનગર શેરી નં. 8) ત્યાં સ્થળ પર આવેલ. તેઓને ગોડાઉનની માલીકી બાબતે પુછપરછ કરતા ગોડાઉન પોતાની માલીકીનું હોવાનુ જણાવેલ અને પોતે આ ગોડાઉન ચારેક મહિનાથી નારાયણસિંહ પદમસિંહ (રહે.દાતીવાસ તા.ભીનમાલ જી.જાલોર રાજસ્થાન)ને ભાડેથી આપેલ છે અને તેના ભાડા કરારની નકલ રજુ કરતા પોલીસે આ નકલ કબ્જે કરી હતી.
