New Delhiતા.૨૯
તમિલનાડુમાં સરકારી નોકરી માટે રોકડ રકમનો મોટો કૌભાંડ સામે આવ્યો છે. એન્ફોર્સમેન્ટ ડિરેક્ટોરેટ (ઈડી) એ રાજ્ય પોલીસને એક વિગતવાર અહેવાલ મોકલ્યો છે, જેમાં મ્યુનિસિપલ એડમિનિસ્ટ્રેશન અને પાણી પુરવઠા વિભાગમાં ૨,૫૩૮ જગ્યાઓ માટે ભરતીમાં મોટા પાયે ભ્રષ્ટાચારનો આરોપ મૂકવામાં આવ્યો છે. એજન્સી અનુસાર, આ જગ્યાઓ માટે દરેક ઉમેદવાર પાસેથી ૨૫ થી ૩૫ લાખ સુધીની લાંચ લેવામાં આવી હતી. ઈડ્ઢ એ ટ્રૂ વેલ્યુ હોમ્સ નામની કંપની સાથે જોડાયેલી મની લોન્ડરિંગ તપાસ દરમિયાન આ ખુલાસો કર્યો હતો. આ કંપની કથિત રીતે રાજ્યના એમએડબ્લ્યુએસ મંત્રી કે.એન. નેહરુના ભાઈ એન. રવિચંદ્રન સાથે જોડાયેલી છે.
ઈડીએ જણાવ્યું હતું કે આ ભરતીઓ ઓગસ્ટ ૨૦૨૫ માં થઈ હતી, અને મુખ્યમંત્રી એમ.કે. સ્ટાલિને પોતે ૬ ઓગસ્ટના રોજ નિમણૂક પત્રોનું વિતરણ કર્યું હતું. અહેવાલ મુજબ, ભરતી પ્રક્રિયામાં માત્ર નાણાકીય ગેરરીતિઓ જ નહીં, પરંતુ અન્ના યુનિવર્સિટી દ્વારા લેવામાં આવેલી પરીક્ષામાં પણ ગોટાળા કરવામાં આવ્યા હતા. એજન્સીનો દાવો છે કે કેટલાક “રાજકીય રીતે પ્રભાવશાળી વ્યક્તિઓ” એ પરીક્ષાના પરિણામોમાં દખલ કરી હતી અને ઓછામાં ઓછા ૧૫૦ ઉમેદવારોને છેતરપિંડીથી પાસ કર્યા હતા. આ ઉમેદવારોને પાછળથી સરકારી હોદ્દા પર નિયુક્ત કરવામાં આવ્યા હતા. ઈડીએ તમિલનાડુ પોલીસ વડાને ૨૩૨ પાનાનો રિપોર્ટ (ડોઝિયર) સુપરત કર્યો છે, જેમાં મળેલી લાંચ, પૈસાનો માર્ગ, કયા ઉમેદવારોને ફાયદો થયો અને પરીક્ષા પ્રક્રિયામાં ક્યાં અનિયમિતતાઓ થઈ તેની વિગતો આપવામાં આવી છે.
રિપોર્ટમાં ૧૫૦ ઉમેદવારોના નામ અને તેમની શંકાસ્પદ યોગ્યતાનું સંપૂર્ણ વર્ણન શામેલ છે. ઈડીએ પીએમએલએની કલમ ૬૬(૨) હેઠળ આ પત્ર મોકલ્યો છે અને પોલીસને આ મામલાની ફોજદારી તપાસ શરૂ કરવા જણાવ્યું છે. ભરતી પ્રક્રિયા જાન્યુઆરી ૨૦૨૪ માં શરૂ થઈ હતી અને આશરે ૧.૧૨ લાખ ઉમેદવારોએ અરજી કરી હતી. આ પદોમાં સહાયક ઇજનેરો, જુનિયર ઇજનેરો, ટાઉન પ્લાનિંગ અધિકારીઓ અને સેનિટરી ઇન્સ્પેક્ટરનો સમાવેશ થાય છે. જો ઈડીના આરોપો સાબિત થાય છે, તો આ કેસ તમિલનાડુના ઇતિહાસમાં સૌથી મોટા “નોકરી માટે રોકડ” કૌભાંડોમાંનો એક બની શકે છે અને રાજ્યના રાજકારણમાં નોંધપાત્ર રીતે ખલેલ પહોંચાડી શકે છે.
