Ahmedabad,તા.૧૦
શક્તિસિંહ ગોહિલે ગુજરાત પ્રદેશ કોંગ્રેસ સમિતિના પ્રમુખ પદેથી રાજીનામું આપ્યા બાદ, ગુજરાત કોંગ્રેસના નેતાઓને આજે દિલ્હી બોલાવવામાં આવ્યા છે. રાહુલ ગાંધી અને મલ્લિકાર્જુન ખડગેની અધ્યક્ષતામાં એક બેઠક યોજાવાની છે. આજે ભૂતપૂર્વ પ્રદેશ પ્રમુખો અને વિપક્ષી નેતાઓ સાથે બેઠક યોજાશે. આ બેઠકમાં નવા પ્રદેશ પ્રમુખની ચર્ચા થઈ શકે છે.
દિલ્હીમાં યોજાનારી બેઠકમાં ગુજરાત પ્રદેશ કોંગ્રેસ સમિતિના ભૂતપૂર્વ પ્રમુખો, ભૂતપૂર્વ વિપક્ષી નેતાઓ સહિત નેતાઓની એક મહત્વપૂર્ણ બેઠક યોજાશે. ગેનીબેન ઠાકોર અને શૈલેષ પરમાર પણ બેઠકમાં હાજરી આપવા માટે દિલ્હી જવા રવાના થયા છે. શક્તિસિંહ ગોહિલના રાજીનામા બાદ, નવા પ્રમુખની પસંદગી અંગે મહત્વપૂર્ણ ચર્ચા થશે.આ બેઠકમાં ભરતસિંહ સોલંકી, અમિત ચાવડા, સિદ્ધાર્થ પટેલ, પરેશ ધાનાણી, શક્તિસિંહ ગોહિલ, ગેનીબેન ઠાકોર, શૈલેષ પરમાર હાજર રહેશે
ખડગે અને રાહુલ ગાંધી સમક્ષ ગુજરાત કોંગ્રેસની કમાન કોને સોંપવી તે અંગે ચર્ચા થશે. નોંધનીય છે કે અગાઉ પાટીદાર અને ઓબીસી સમુદાયના નેતાઓ દિલ્હીમાં પ્રદેશ પ્રમુખનું પદ તેમના સમુદાયને આપવા માટે સક્રિય રહ્યા છે. જોકે, ગુજરાત કોંગ્રેસના નવા પ્રમુખના નામ અંગે આજની બેઠકમાં મોટો નિર્ણય લેવામાં આવી શકે છે.
