Haridwar,તા.7
ઉત્તરાખંડના હરિદ્વારમાં સગીર મહિલા હોકી ખેલાડી પર બળાત્કારનો મામલો સામે આવ્યો છે. પીડિતાએ તેના કોચ પર બળાત્કારનો આરોપ લગાવ્યો છે. આરોપી કોચ ભાનુ અગ્રવાલ જે ચંપાવત જિલ્લાનો રહેવાસી છે, તેની પોલીસે ધરપકડ કરી છે અને તેને જેલમાં ધકેલી દીધો છે. આ ઘટનાએ સમગ્ર રાજ્યમાં હલચલ મચાવી દીધી છે, ખાસ કરીને એવા સમયે જ્યારે ઉત્તરાખંડમાં 28મી જાન્યુઆરીથી 38મી નેશનલ ગેમ્સનું આયોજન થવા જઈ રહ્યું છે.
આ ઘટના હરિદ્વારના સિદકુલ પોલીસ સ્ટેશન વિસ્તારમાંથી પ્રકાશમાં આવી હતી અને પોલીસે પીડિતાના પિતાની ફરિયાદ પર કેસ નોંધ્યો હતો. આરોપીની ભારતીય દંડ સંહિતાની કલમ 376 અને પોક્સો એક્ટ હેઠળ ધરપકડ કરવામાં આવી હતી
પીડિતાની મેડિકલ તપાસ કરવામાં આવી છે, અને ફોરેન્સિક ટીમે સ્થળ પરથી પુરાવા એકત્રિત કર્યા છે, જેને તપાસ માટે મોકલવામાં આવ્યા છે. હરિદ્વારના વરિષ્ઠ પોલીસ અધિક્ષક પ્રમેન્દ્ર સિંહ ડોભાલે કહ્યું કે આ મામલાની ઉચ્ચ સ્તરે તપાસ કરવામાં આવી રહી છે.
ઘટનાની જાણકારી મળ્યા બાદ ઉત્તરાખંડના રમતગમત મંત્રી રેખા આર્ય હરિદ્વાર પહોંચ્યા અને પીડિતા અને તેના પરિવારને મળ્યા હતા. આ ઘટનાને જઘન્ય અપરાધ ગણાવતા તેમણે કહ્યું કે સરકાર સંપૂર્ણ રીતે પીડિતાની સાથે છે. મંત્રીએ એમ પણ કહ્યું કે આરોપી કોચની કરાર આધારિત સેવાઓ તાત્કાલિક અસરથી સમાપ્ત કરવામાં આવી છે.
