Rajkot,તા.15
હીરાસર એરપોર્ટમાં જીએસટી ઓપરેટર તરીકે નોકરી કરતા યુવકે પૂર્વ વાગ્દતાના ત્રાસથી કંટાળી ઝેરી દવા ગટગટાવી આપઘાતનો પ્રયાસ કર્યાનો બનાવ સામે આવ્યો છે. મામલામાં કુવાડવા પોલીસે યુવકની ફરિયાદ પરથી મમતા નામની વાગ્દતા વિરુદ્ધ આપઘાતની ફરજ પાડવાનો ગુનો નોંધ્યો છે.
મામલામાં હીરાસર એરપોર્ટમાં જીએસટી ઓપરેટર હરેશભાઈ ગોબરભાઇ દુમાદીયાએ કુવાડવા પોલીસમાં નોંધાવેલી ફરિયાદમાં જણાવ્યું હતું કે, ત્રણેક માસ પૂર્વે મારી સગાઈ સાયલા તાલુકાના ઉમાપર ગામની યુવતી સાથે થયાં હતા. ગત તા. ૨૯/૦૧/૨૦૨૫ ના રોજ મમતા સુરેન્દ્રનગર ખાતે રહી સરકારી પરીક્ષાની તૈયારી કરતી હોય પણ તે રાત્રીના મોડે સુધી બહાર રહેતી હોય અને વાંચવામાં ધ્યાન આપતી ન હોય જેથી મે મમતાને કહેલ કે વાંચવું ન હોય તો પોતાના ગામ ખાતે ચાલી જા.
બાદમાં મને સુનીલ નામના યુવકના ઇન્સટાગ્રામ એકાઉન્ટ પરથી મેસેજ આવ્યો હતો. જેમાં મારા અને મમતા વચ્ચે શું ચાલે છે તેમ પૂછતાં મે સામેવાળી વ્યક્તિનુ નામ પૂછતાં તેણે કહ્યું હતું કે, મારૂ નામ સુનિલ નથી, હું મમતાની મહિલા મિત્ર બોલું છું તું મમતા ને લગ્ન પૂર્વે મળવા અને બધું કરવા માગે છે જેથી મે આ બાબતે મમતાના ભાઈ રણજીતને વાત કરતા તેણે કહ્યું હતું આ ઇન્સ્ટાગ્રામ એકાઉન્ટ તેના મામાં સુનિલભાઈનુ છે. જે બાદ સુનિલભાઈએ મમતાના પિતાને વાત કરતા તેમણે સગાઈ તોડી નાખવાની વાત કરી હતી અને ત્યારબાદ સગાઈ તૂટી ગયેલ હતી.
બાદમાં ગત તા.૦૬/૦૨/૨૦૨૫ ના રોજ હું તથા મારા માસીયાઈ રઘુભાઈ અને બુધાભાઈ ત્રણેય સુરેન્દ્રનગર ખાતે ભેગા થયેલ હતા. જે બાદ હું કુવાડવા આવવા રવાના થતાં સાયલા ચોકડીએ પહોંચતા એક અજાણી વ્યક્તીએ મારી ગાડી રોકાવેલ અને કહેલ કે ચોટીલા જતા હોય તો મને લેતા જાવ જેથી મેં અજાણ્યા વ્યક્તિને મારી ગાડીમાં બેસાડી લીધા હતા. થોડે આગળ જતા તે વ્યક્તીએ કહેલ કે, મેં તને ઇન્સ્ટાગ્રામમાં મેસેજ ડીલીટ કરી દીધેલ છે તો પણ શા માટે બધાને કહે છે અને તારા પરિવારને સમાજમાં બદનામ કરી નાખીશ અને તારી ફેમેલીને પતાવી દઇશ તેમ કહી ધમકી આપી છરી બતાવેલ હતી અને બાદમાં ગાડીમાંથી ઉતરી ગયો હતો.
બાદ મમતાએ ફરીવાર મેસેજ કરીને કહ્યું હતું કે, હું ભાઈ રણજીતને એવુ કહીશ કે હરેશ હજુ મને મેસેજ કરે છે અને મારી સાથે જ લગ્ન કરશે તેમ કહે છે. બાદમાં મને રણજિતનો ફોન આવેલ કે, તમે કેમ હજુ મારી બહેનને મેસેજ કરો છો ત્યારે મે રણજીતભાઈને આખી ઘટના સમજાવવાનો પ્રયાસ કર્યો હતો પણ મમતાની આ બધી વાતો મને લાગી આવતા મે ઝેરી દવા પી આપઘાતનો પ્રયાસ કર્યો હતો.
