Gujarat,તા,12
ગુજરાતમાં મેઘરાજાએ દક્ષિણ ગુજરાતમાં ધબધબાટી બોલાવી છે, તો બીજી તરફ ઉત્તર ગુજરાતમાં હજુ વરસાદની ખેંચ વર્તાઈ રહી છે. ક્લાયમેટ ચેન્જને કારણે ગુજરાતમાં વરસાદની આખી પેટર્ન બદલાઈ છે. રાજ્યમાં અતિથી અતિભારે વરસાદ પડવાની ઘટનામાં વધારો નોંધાયો છે. ખેડૂતો માટે પણ માઠા સમાચાર એ છે કે, નિષ્ણાતોનું માનવુ છે કે, જો આ જ પરિસ્થિતી રહી તો, પૂરની ઘટનાઓમાં વધારો થશે તે દિવસો દૂર નથી.
વરસાદની પેટર્નમાં ફેરફાર
ગ્લોબલ વોર્મિંગને લીધે વરસાદની પેટર્નમાં ફેરફાર થયો છે. આ કારણોસર ગુજરાતમાં પણ વરસાદનું આખુ ચિત્ર બદલાયુ છે. હવે એવું જોવા મળી રહ્યુ છે કે, વરસાદ જ્યાં પડે ત્યાં એકધારો ખાબકે છે. જ્યારે અન્ય ઠેકાણે વરસાદનું ટીપુય પડતું નથી. રાજ્યસભામાં કેન્દ્ર સરકારે રિપોર્ટ રજૂ કર્યો છે, જેમાં એવા તારણો રજૂ કરાયા છે કે, છેલ્લાં ઘણાં સમયથી ભારતના વિવિધ ભાગોમાં તાપમાનમાં ફેરફાર જોવા મળી રહ્યો છે. આ ઉપરાંત પવનની પેટર્નમાં પણ બદલાવ જોવા મળી રહ્યો છે. દરિયાની જળસપાટી ચિંતાજનક હદે વધી રહી છે. વરસાદની બદલાયેલી પેટર્ન માટે આ બધાય જવાબદાર પરિબળો છે.
ગુજરાતમાં વરસાદની તિવ્રતા ક્રમશ વધી રહી છે. ક્લાયમેટ ચેન્જને લીધે જ કચ્છ અને સૌરાષ્ટ્રમાં વરસાદનું પ્રમાણ વધ્યુ છે. રિપોર્ટમાં એ વાતનો ઉલ્લેખ કરાયો છે કે, વર્ષ 2021માં ગુજરાતમાં 634 વખત અઢી માંડીને સાડા ચાર ઈંચ સુધી વરસાદ પડ્યો હતો. આ દરમિયાન એવુ બન્યુ કે, 174 વખત સાડા 4થી માંડીને 8 ઈંચ સુધી વરસાદ ખાબક્યો હતો. 18 વખત તો 8 ઈંચથી વધુ વરસાદ વરસ્યો હતો. વર્ષ 2023માં 635 વખત અઢી માંડીને સાડા ચાર ઈંચ સુધી વરસાદ વરસ્યો. જ્યારે 264 વખત સાડા ચારથી માંડીને 8 ઈંચ સુધી વરસાદ નોંધાયો હતો. 49 વખત 8 ઈંચથી વધુ વરસાદ ખાબક્યો હતો.
અતિભારે વરસાદ નુકસાનકારક
ગુજરાતમાં એતિ ભારે વરસાદ પડવાની ઘટનાઓમાં નોંધપાત્ર વધારો થઈ રહ્યો છે. જેને લઈને આગામી દિવસોમાં પૂર આવવાની ઘટનાઓમાં પણ વધારો થાય તેવી ભિતી વ્યક્ત કરવામાં આવી રહી છે. પુરતો વરસાદ જ ખેડૂતો માટે ફાયદાકારક છે. પરંતુ અતિભારે વરસાદ નુકસાનકારક સાબિત થઈ શકે છે. ભારે વરસાદ થાય તો ખેતીને વ્યાપકપણે નુકસાન થાય છે તેથી પાક ઉત્પાદન પર પણ અસર થાય છે. આ જોતાં જ અતિશય ભારે વરસાદ પડવાની ઘટનાથી ખેડૂતો પણ ચિંતામાં મૂકાયા છે. વરસાદની આ જ પેટર્નને કારણે વાદળ ફાટવાની સાથે સાથે ભૂસ્ખલનની ઘટનાઓ વધી રહી છે. આમ પર્વતીય વિસ્તારોમાં બદલાયેલા વાતાવરણની અસર જોવા મળી રહી છે.
ગુજરાતના 42 તાલુકામાં 40 ઈંચથી વધુ વરસાદ
ગુજરાતમાં અત્યારસુધી 42 તાલુકા એવા છે, જેમાં 40 ઈંચથી વધુ વરસાદ વરસી ચૂક્યો છે. આ સિવાય 73 તાલુકામાં 20થી 40 ઈંચ, 101 તાલુકામાં 10થી 20 ઈંચ, 35 તાલુકામાં 5થી 10 ઈંચ સુધી વરસાદ નોંધાયો છે. 5 ઈંચથી ઓછો વરસાદ પડ્યો હોય તેવા એકપણ તાલુકા નથી.
