Mumbai,તા.18
ભારતનો સંગીત ઉદ્યોગ ઝડપથી સ્થાનિક અને વૈશ્ર્વિક બજાર તરીકે ઉભરી રહ્યો છે, આ ક્ષેત્રની કંપનીઓ તેમનાં રોકાણમાં વધારો કરી રહી છે, ટોચનાં મીડિયા એક્ઝિક્યુટિવ્સે જણાવ્યું હતું કે, આ વૃદ્ધિ મ્યુઝિક સ્ટ્રીમિંગના ઉદયને કારણે છે.
યુનિવર્સલ અને વોર્નર મ્યુઝિકના વૈશ્ર્વિક સીઈઓની દેશમાં મુલાકાતો દ્વારા ભારતીય સંગીત બજારનાં વધતાં મહત્વને પ્રકાશિત કરવામાં આવે છે. સારેગામાના એમડી વિક્રમ મહેરાએ જણાવ્યું હતું કે ભારત સંગીત ઉદ્યોગ માટે આગામી મુખ્ય વૃદ્ધિ બજાર બનવા માટે તૈયાર છે. તેમણે ઉમેર્યું હતું કે એકવાર ડિઝની પ્લસ હોટસ્ટાર અને જિયોસિનેમાનું વિલીનીકરણ થઈ જાય, પછી મુખ્ય ખેલાડીઓનું ધ્યાન સંગીત સ્ટ્રીમિંગ તરફ વળશે. મહેરાએ કહ્યું, જે વૈશ્ર્વિક સ્તરે સંગીત ઉદ્યોગને ટ્રેક કરે છે તે સમજે છે કે સબ્સ્ક્રિપ્શન ભારતમાં ખૂબ જ મોટી સંખ્યામાં થશે તેને વધુ 12 થી 15 મહિનાનો સમય આપો.
મહેરાએ નોંધ્યું કે હાલમાં, માત્ર બે પ્લેટફોર્મ્સ-સ્પોટીફાઈ અને જિયોસાવન-ફ્રી સેવાઓ ઓફર કરે છે. જો આ પ્લેટફોર્મ્સ સંપૂર્ણ રીતે પેઇડ મોડલ્સમાં આવશે તો ભારતને સબ્સ્ક્રિપ્શન વૃદ્ધિના માર્ગ તરફ દોરી જશે. એક અહેવાલમાં જણાવવામાં આવ્યું છે કે ભારતમાં સંગીત ઉદ્યોગ વાર્ષિક 12000 કરોડની આવક ઉભી કરે છે, જે ભારતીય મીડિયા અને મનોરંજન ક્ષેત્રનો આશરે 6 ટકા હિસ્સો છે. રિપોર્ટમાં વધુમાં નોંધવામાં આવ્યું છે કે ભારત દર વર્ષે 20 થી 25 હજાર નવાં ગીતોનું નિર્માણ કરે છે, જે 40000 થી વધુ સંગીતકારો દ્વારા બનાવવામાં આવે છે.
રિપોર્ટમાં સ્ટ્રીમિંગ, ફિલ્મો, ટેલિવિઝન, રેડિયો, ગેમિંગ અને સોશિયલ મીડિયા સહિત વિવિધ મીડિયા પ્લેટફોર્મમાં સંગીતની અભિન્ન ભૂમિકાને પણ પ્રકાશિત કરવામાં આવી હતી.
તાજેતરના અર્નિંગ કોલમાં, ઝી એન્ટરટેઇનમેન્ટના સીઇઓ પુનિત ગોએન્કાએ સંગીત વ્યવસાયની નફાકારકતા અને વૃદ્ધિની સંભાવનાને પ્રકાશિત કરી, ઝી મ્યુઝિક કંપની તેનાં કેટલોગને વિસ્તારવા અને માર્જિન વધારવા પર ધ્યાન કેન્દ્રિત કરી રહી છે. તેમણે કહ્યું કે “મને લાગે છે કે સંગીત એ સેગમેન્ટના મુખ્ય સ્તંભોમાંનું એક છે જે અમે ચલાવીએ છીએ. હું સાચે જ માનું છું કે સંગીત આગળ વધવું એ કંપની માટે મુખ્ય સંપત્તિ બની રહેશે અને અમે તેની પાછળ રોકાણ કરવાનું ચાલું રાખીશું.
મ્યુઝિક કંપની ટીપ્સ ઇન્ડસ્ટ્રીઝના સીએમડી કુમાર તૌરાનીએ વિશ્લેષકોને જણાવ્યું હતું કે કંપની એક્વિઝિશન માટે ખુલ્લી છે પરંતુ હાલમાં તેને કોઈ સક્ષમ તકો દેખાતી નથી. તેમણે કહ્યું કે “અમારી પાસે હાલમાં એવી કોઈ વિઝિબિલિટી નથી, જે અમે મેળવી શકીએ; અત્યારે કંઈપણ ઉપલબ્ધ નથી. તેથી અમે માત્ર રાહ જોઈ રહ્યાં છીએ, અને અમારી પાસે રોકડ છે. જો કોઈ તક હશે, તો અમે ચોક્કસપણે તેને પકડી લઈશું.
એશિયા, આફ્રિકા અને મધ્ય પૂર્વ માટે યુનિવર્સલ મ્યુઝિક ગ્રૂપના સીઈઓ એડમ ગ્રેનાઈટે જણાવ્યું હતું કે કંપની તેનાં ભારતમાં બિઝનેસ વધારવાની યોજના ધરાવે છે. તેમણે હાઇલાઇટ કર્યું કે ભારત આગામી વર્ષોમાં વૈશ્વિક સ્તરે ટોચનાં 10 મ્યુઝિક માર્કેટમાં પ્રવેશ કરશે તેવી અપેક્ષા છે. વોર્નર મ્યુઝિક ગ્રૂપના સીઈઓ રોબર્ટ ક્ધિકલે જણાવ્યું હતું કે ભારત ચીનની સાથે વોર્નર મ્યુઝિક માટેનાં ટોચનાં બે વૈશ્વિક વિસ્તરણ બજારોમાંનું એક છે.
