Virginia,તા.૧૯
બાંગ્લાદેશના ભૂતપૂર્વ વડા પ્રધાન શેખ હસીનાના પુત્ર, સજીબ વાઝેદ જોયે તેમની માતાનો જીવ બચાવવા બદલ ભારતનો આભાર માન્યો છે. જોયે બાંગ્લાદેશની વચગાળાની સરકારની તેમની માતાના પ્રત્યાર્પણની માંગણીને પણ સંપૂર્ણપણે નકારી કાઢી છે. તેમણે જણાવ્યું હતું કે ત્યાંની કોર્ટ કાર્યવાહીમાં કોઈ યોગ્ય કાયદાકીય પ્રક્રિયાનું પાલન કરવામાં આવ્યું ન હતું. સજીબ વાઝેદ જોયે કહ્યું, “ભારતે મારી માતાનો જીવ બચાવ્યો. જો તેમણે ઓગસ્ટ ૨૦૨૪ માં બાંગ્લાદેશ છોડ્યું ન હોત, તો આતંકવાદીઓએ તેમની હત્યા કરી હોત. હું મારી માતાને આશ્રય આપવા બદલ વડા પ્રધાન નરેન્દ્ર મોદીનો હૃદયપૂર્વક આભાર માનું છું.”
જોયે બાંગ્લાદેશ સરકારની પ્રત્યાર્પણની માંગણીને સંપૂર્ણપણે ગેરકાયદેસર ગણાવી. તેમણે કહ્યું, “ટ્રાયલ પહેલાં ૧૭ ન્યાયાધીશોને હટાવવામાં આવ્યા હતા. સંસદીય મંજૂરી વિના કાયદામાં ફેરફાર કરવામાં આવ્યા હતા. મારી માતાના વકીલોને કોર્ટમાં આવવાની પણ મંજૂરી આપવામાં આવી ન હતી.” જ્યારે કોઈ કાનૂની પ્રક્રિયા ન હોય ત્યારે કોઈ પણ દેશ પ્રત્યાર્પણ કરશે નહીં. તેમને વિશ્વાસ છે કે ભારત આ માંગણી ક્યારેય સ્વીકારશે નહીં. જોયે સ્વીકાર્યું કે તેમની સરકારે શરૂઆતના વિદ્યાર્થી આંદોલનને ખોટી રીતે સંભાળ્યું હતું, પરંતુ ત્યારબાદ જે બન્યું તે સ્વયંભૂ જાહેર આંદોલન નહોતું પરંતુ એક આયોજિત રાજકીય બળવો હતો. તેમણે આરોપ લગાવ્યો કે પાકિસ્તાનની ગુપ્તચર એજન્સી, ૈંજીૈં એ વિરોધીઓમાં ઘૂસણખોરી કરનારા આતંકવાદીઓને શસ્ત્રો પૂરા પાડ્યા હતા.
પાકિસ્તાની સંડોવણીના વીડિયો પુરાવા ટાંકીને, જોયે કહ્યું, “આ શસ્ત્રો ઉપખંડમાં બીજે ક્યાંયથી પૂરા પાડી શકાતા નથી; એકમાત્ર સ્ત્રોત ૈંજીૈં છે.” જોયે ચેતવણી આપી હતી કે મુહમ્મદ યુનુસ વચગાળાની સરકારે હસીના સરકાર દરમિયાન દોષિત ઠેરવવામાં આવેલા હજારો આતંકવાદીઓને મુક્ત કર્યા હતા. હવે, લશ્કર-એ-તૈયબા બાંગ્લાદેશમાં ખુલ્લેઆમ કાર્યરત છે. તેમણે દિલ્હીમાં તાજેતરના આતંકવાદી હુમલાઓને બાંગ્લાદેશમાં લશ્કર સાથે જોડાયેલા આતંકવાદીઓ સાથે પણ જોડ્યા. જોયે દાવો કર્યો હતો કે ભૂતપૂર્વ યુએસ રાષ્ટ્રપતિ ડોનાલ્ડ ટ્રમ્પે કહ્યું છે કે યુએસએઆઈડી દ્વારા બાઈડેન વહીવટીતંત્રે બાંગ્લાદેશમાં શાસન પરિવર્તન લાવવા માટે લાખો ડોલર ખર્ચ્યા હતા.
જોયે મુહમ્મદ યુનુસની વચગાળાની સરકારને સંપૂર્ણપણે ગેરકાયદેસર ગણાવી. તેમણે કહ્યું, “એક બિનચૂંટાયેલી સરકાર એક વર્ષથી વધુ સમયથી સત્તામાં છે. બધું અલોકતાંત્રિક રીતે થઈ રહ્યું છે. ૧૦,૦૦૦ થી વધુ રાજકીય કેદીઓ હજુ પણ જેલમાં છે, જેમાં ૧૦૦ થી વધુ ભૂતપૂર્વ સાંસદોનો સમાવેશ થાય છે. જો મુહમ્મદ યુનુસ એટલા લોકપ્રિય છે, તો તેઓ કોઈ ચૂંટણી કેમ નથી કરાવી રહ્યા? વિદ્યાર્થી ચળવળના પક્ષને સર્વેક્ષણોમાં માત્ર ૨% સમર્થન મળી રહ્યું છે. હું સંમત છું કે બાંગ્લાદેશમાં ભ્રષ્ટાચાર અસ્તિત્વમાં હતો. પરંતુ મારી માતાના સમયમાં, બાંગ્લાદેશ વિશ્વના સૌથી ભ્રષ્ટ દેશોની ટોચના ૧૦ યાદીમાંથી બહાર નીકળી ગયું. દેશ ’એશિયન ટાઈગર’ બનવાના માર્ગે હતો, જે ઓછામાં ઓછા વિકસિત દેશોની શ્રેણીમાંથી બહાર આવ્યો હતો. વ્યાપક ભ્રષ્ટાચાર સાથે આટલી ઝડપી પ્રગતિ શક્ય ન હોત.”
