New Delhi, તા.11
ભારતે એશિયા કપ 2025 ના ગ્રુપ-A મેચમાં સંયુક્ત આરબ અમીરાત (UAE) ને નવ વિકેટથી હરાવીને ટુર્નામેન્ટની શાનદાર શરૂઆત કરી. ભારત માટે, તે ટુર્નામેન્ટ માટે પ્રેકિ્ટસ મેચ જેવું હતું. કુલદીપ યાદવ અને શિવમ દુબેની ઘાતક બોલિંગ અને પછી અભિષેક શર્માની ધમાકેદાર બેટિંગે ભારતને શાનદાર વિજય અપાવ્યો. પહેલા બેટિંગ કરતી UAE 13.1 ઓવરમાં 57 રનમાં ઓલઆઉટ થઈ ગઈ, જે ભારતે માત્ર 27 બોલમાં મેળવી લીધી. ભારતે 93 બોલ બાકી રહેતા મેચ જીતી લીધી.
કોઈપણ ટેસ્ટ રમનાર રાષ્ટ્ર દ્વારા બોલની દ્રષ્ટિએ આ ભારતની બીજી સૌથી મોટી જીત હતી. જો કે, તે જ મેચ દરમિયાન, એક રસપ્રદ ઘટનાએ બધાનું ધ્યાન ખેંચ્યું. જ્યારે ભારતીય કેપ્ટન સૂર્યકુમાર યાદવે ખેલદિલી બતાવતા, ક્લીન આઉટ હોવા છતાં અપીલ પાછી ખેંચી લીધી.
આ ઘટના 13મી ઓવરના ચોથા બોલ પર બની હતી, જ્યારે બેટ્સમેન જુનૈદ સિદ્દીકી શિવમ દુબેના બાઉન્સર પર ક્રીઝની બહાર હતો. વિકેટકીપર સંજુ સેમસનનો થ્રો સ્ટમ્પ નીચે પટકાયો અને ત્રીજા અમ્પાયરની મદદથી, રિપ્લેમાં સ્પષ્ટપણે દેખાઈ આવ્યું કે બેટ્સમેન ક્રીઝની બહાર હતો. સ્ક્રીન પર “આઉટ” સિગ્નલ પણ આવ્યો, પરંતુ સૂર્યકુમારે અપીલ પાછી ખેંચી લીધી.
બોલર શિવમ દુબેનો ટુવાલ તેના રન-અપ દરમિયાન પડી ગયો હતો, જે સિદ્દીકીએ તરત જ દર્શાવ્યું હતું. આ કારણે, બેટ્સમેન થોડા સમય માટે વિચલિત થઈ ગયો અને ક્રીઝ પર પાછો ફરી શક્યો નહીં. બાદમાં જ્યારે રિપ્લે બહાર આવ્યો, ત્યારે સ્પષ્ટ થયું કે આઉટનો નિર્ણય ટુવાલ સાથે સંબંધિત નહોતો, પરંતુ બેટ્સમેનની બેદરકારીને કારણે હતો. આમ છતાં, સૂર્યકુમારે અપીલ પાછી ખેંચીને ખેલદિલીનું ઉદાહરણ બેસાડ્યું.
