Mumbai,તા.૧૬
અભિનેત્રી શિલ્પા શેટ્ટી અને રાજ કુન્દ્રા સાથે જોડાયેલા ૬૦ કરોડ રૂપિયાના છેતરપિંડીના કેસમાં કંપનીના ખાતાઓમાં થયેલા વ્યવહારોની તપાસ કરવામાં આવી રહી છે. સમાચાર એજન્સી પીટીઆઈ અનુસાર, એક પોલીસ અધિકારીએ બુધવારે જણાવ્યું હતું કે ઉદ્યોગપતિ રાજ કુન્દ્રા અને તેમની અભિનેત્રી પત્ની શિલ્પા શેટ્ટી સાથે સંકળાયેલા ૬૦ કરોડ રૂપિયાના છેતરપિંડીના કેસમાં નાણાંના વ્યવહારોની તપાસ કરવામાં આવી રહી છે. આ દંપતી દ્વારા કરવામાં આવેલા ખર્ચ સાચા હતા કે નહીં તે નક્કી કરવાના પ્રયાસો પણ ચાલી રહ્યા છે.
એક અધિકારીએ જણાવ્યું હતું કે આ કેસની તપાસ કરી રહેલી મુંબઈ પોલીસની આર્થિક ગુના શાખા,૨૦૧૫ થી હાઇ-પ્રોફાઇલ દંપતી સાથે જોડાયેલી કંપનીના બેંક ખાતાઓની તપાસ કરી રહી છે જેથી તેમાં દર્શાવેલ ખર્ચ સાચા હતા કે નહીં તે નક્કી કરી શકાય. તેમણે કહ્યું કે ખાતાઓ અને ભંડોળ પ્રવાહની તપાસ દરમિયાન, એવું જાણવા મળ્યું કે શિલ્પા શેટ્ટીને કંપની પાસેથી ફી તરીકે ૪ કરોડ રૂપિયા મળ્યા હતા.
આર્થિક ગુના શાખાના અધિકારીઓ હવે બંધ થયેલી કંપની સાથે સંકળાયેલા લોકોના નિવેદનો રેકોર્ડ કરી રહ્યા છે. અધિકારીએ જણાવ્યું હતું કે પોલીસે અત્યાર સુધી રાજ કુન્દ્રા, શિલ્પા શેટ્ટી અને બેસ્ટ ડીલ ટીવી પ્રાઇવેટ લિમિટેડના આરપી(રિઝોલ્યુશન પ્રોફેશનલ) ના નિવેદનો નોંધ્યા છે. અભિનેત્રીએ અગાઉ પોતાના નિવેદનમાં જણાવ્યું હતું કે તે કંપનીના રોજિંદા કામકાજનો હવાલો સંભાળતી નથી અને પ્લેટફોર્મ (બેસ્ટ ડીલ) પર દેખાવા બદલ તેમને સેલિબ્રિટી ફી ચૂકવવામાં આવી હતી.
શિલ્પા શેટ્ટી અને રાજ કુંદ્રા વિરુદ્ધ મુંબઈના જુહુ પોલીસ સ્ટેશનમાં ઉદ્યોગપતિ દીપક કોઠારી સાથે લોન-કમ-ઇન્વેસ્ટમેન્ટ ડીલમાં આશરે ૬૦ કરોડની છેતરપિંડી કરવાનો કેસ નોંધવામાં આવ્યો હતો. કોઠારીએ પોતાની ફરિયાદમાં આરોપ લગાવ્યો હતો કે સેલિબ્રિટી દંપતીએ તેમને ૨૦૧૫ થી ૨૦૨૩ દરમિયાન તેમની કંપનીમાં ૬૦ કરોડનું રોકાણ કરવા માટે પ્રેરિત કર્યા હતા, પરંતુ આ પૈસાનો તેમના અંગત લાભ માટે દુરુપયોગ કરવામાં આવ્યો હતો. ઉદ્યોગપતિનો આરોપ છે કે શિલ્પા અને રાજે કંપનીમાં રોકાણ કરવાને બદલે પૈસા પોતે ખર્ચ્યા હતા.
