Mumbai,તા.16
BCCIએ શુક્રવારે ઈન્ડિયન પ્રીમિયર લીગ (IPL)ની હરાજી માટે 574 ખેલાડીઓની અંતિમ યાદી જાહેર કરી. જેમાં 366 ભારતીય અને 208 વિદેશી ખેલાડીઓ સામેલ છે. 81 ખેલાડીઓની મૂળ કિંમત 2 કરોડ રૂપિયા છે.
ઈંગ્લેન્ડના ફાસ્ટ બોલર જોફ્રા આર્ચર અને ઓસ્ટ્રેલિયન ઓલરાઉન્ડર કેમરોન ગ્રીનનું નામ હરાજીની યાદીમાં સામેલ કરવામાં આવ્યું નથી. સાઉદી અરેબિયાના જેદ્દાહ શહેરમાં 24 અને 25 નવેમ્બરે હરાજી થશે. 10 ટીમોમાં 204 ખેલાડીઓની જગ્યા ખાલી છે, ટીમો 70 વિદેશી ખેલાડીઓને ખરીદી શકે છે.
13 વર્ષનો ખેલાડી
બિહારનો 13 વર્ષનો વૈભવ સૂર્યવંશી સૌથી યુવા ખેલાડી છે જ્યારે ઈંગ્લેન્ડનો 42 વર્ષનો ફાસ્ટ બોલર જેમ્સ એન્ડરસન સૌથી મોટી ઉંમરનો ખેલાડી છે. જેમ્સની મૂળ કિંમત 1.25 કરોડ રૂપિયા છે. વૈભવ બિહારમાં ડોમેસ્ટિક ક્રિકેટ રમે છે.
બપોરે 3 વાગ્યે શરૂ થશે
IPL મેગા ઓક્શન 24 નવેમ્બરે બપોરે 3 વાગ્યે શરૂ થશે. હરાજી બીજા દિવસે પણ બપોરે 3 વાગ્યાથી શરૂ થશે. 574 ખેલાડીઓમાંથી, 244 કેપ્ડ છે, જ્યારે 330 અનકેપ્ડ છે. કેપ્ડ ખેલાડીઓમાં 48 ભારતીય, 193 વિદેશી અને 3 સહયોગી દેશોના ખેલાડીઓ હશે. અનકેપ્ડ ખેલાડીઓમાં ભારતના 318 અને વિદેશના 12 ખેલાડીઓ છે.
પંત અને શ્રેયસની મૂળ કિંમત 2 કરોડ રૂપિયા છે
હરાજીમાં માર્કી ખેલાડીઓની 2 યાદી હશે. રિષભ પંત, કાગીસો રબાડા, જોસ બટલર, શ્રેયસ અય્યર, અર્શદીપ સિંહ અને મિશેલ સ્ટાર્કના નામ પ્રથમ યાદીમાં સામેલ છે. બીજી યાદીમાં યુઝવેન્દ્ર ચહલ, લિયામ લિવિંગ્સ્ટન, ડેવિડ મિલર, કેએલ રાહુલ, મોહમ્મદ શમી અને મોહમ્મદ સિરાજનો સમાવેશ થાય છે.
10 ટીમોએ 46 ખેલાડીઓને જાળવી રાખ્યા છે
IPLની મેગા હરાજી દર 3 વર્ષમાં એકવાર થાય છે. જેના માટે આ વખતે ટીમો વધુમાં વધુ 6 ખેલાડીઓ જાળવી શકી હતી. 31 ઓક્ટોબર રિટેન્શનની છેલ્લી તારીખ હતી, આ દિવસે 10 ટીમોએ 46 ખેલાડીઓને રિટેન કર્યા હતા. પંજાબ કિંગ્સે સૌથી ઓછા 2 ખેલાડીઓને જાળવી રાખ્યા હતા. જ્યારે રાજસ્થાન રોયલ્સ અને કોલકાતા નાઈટ રાઈડર્સે વધુમાં વધુ 6-6 ખેલાડીઓ પોતાની સાથે રાખ્યા હતા.
માત્ર 2 ખેલાડીઓને રિટેન કરવાને કારણે પંજાબનું પર્સ સૌથી વધુ છે
પજાબ પાસે હરાજીમાં 110.50 કરોડ રૂપિયાનું પર્સ બાકી છે. તે પછી બેંગલુરુ પાસે 83 કરોડ રૂપિયા બાકી છે. રાજસ્થાનમાં સૌથી ઓછી રકમ 41 કરોડ બાકી છે. રાજસ્થાન અને બેંગલુરુ પાસે પણ કાર્ડ મેચ કરવાનો કોઈ અધિકાર નથી. જ્યારે પંજાબ પાસે 4 અને બેંગલુરુ પાસે 3 છઝખ કાર્ડ બાકી છે.
રાઈટ ટુ મેચ કાર્ડ શું છે?
6 કરતા ઓછા ખેલાડીઓને રિટેન કરનાર તમામ ટીમોને હરાજીમાં રાઈટ ટુ મેચ એટલે કે RTM કાર્ડ મળશે. RTM કાર્ડ વડે ટીમો અગાઉના ખેલાડીને ટીમમાં સામેલ કરી શકશે.
ચાલો એક ઉદાહરણ સાથે RTM ને સમજીએ, ધારો કે ગ્લેન મેક્સવેલ, જે RTMનો છેલ્લી સિઝનમાં ભાગ હતો, તેને MI દ્વારા હરાજીમાં રૂ. 7 કરોડની બોલી લગાવીને ખરીદ્યો હતો. હવે જો RCB ઈચ્છે તો તેઓ RTM કાર્ડનો ઉપયોગ કરીને મેક્સવેલને પોતાની સાથે રાખી શકે છે.
જોકે, આ વખતે MI પાસે મેક્સવેલ માટે બિડ વધારવાનો વિકલ્પ પણ હશે. RTM નો ઉપયોગ કર્યા પછી, MI મેક્સવેલ પર 10 કરોડ રૂપિયાની બિડ પણ કરી શકે છે.
હવે જો RCB મેક્સવેલને પોતાની સાથે રાખવા માંગે છે તો તેણે 10 કરોડ રૂપિયા ચૂકવવા પડશે. આ સાથે તેના આરટીએમ કાર્ડનો ઉપયોગ કરવામાં આવશે. જો RCB ઇનકાર કરશે તો મેક્સવેલ રૂ. 10 કરોડમાં MI પાસે જશે.
