Iran,તા,25
ઇરાન અને ઇઝરાયલ વચ્ચે યુદ્ધવિરામ બાદ, ગલ્ફ ક્ષેત્રના દેશો, ખાસ કરીને કતાર, સંયુક્ત આરબ અમીરાત (UAE), બહેરીન, ઇરાક અને કુવૈત, એ તેમના હવાઈ ક્ષેત્ર ફરીથી ખોલ્યા છે.
પરિણામે, એર ઇન્ડિયા અને એર ઇન્ડિયા એક્સપ્રેસ સહિત અનેક એરલાઇન્સે પશ્ચિમ એશિયા માટે તેમની ફ્લાઇટ્સ ફરી શરૂ કરી છે. પશ્ચિમ એશિયામાં તણાવ વધ્યા બાદ, ખાસ કરીને 23 જૂને ઇરાને કતારમાં યુએસ અલ-ઉદેદ લશ્કરી મથક પર છ મિસાઇલો છોડ્યા પછી, આ દેશોએ તેમના હવાઈ ક્ષેત્રને અસ્થાયી રૂપે બંધ કરી દીધા હતા. આના કારણે ભારતીય એરલાઇન્સ સહિત અનેક ફ્લાઇટ્સ રદ કરવી પડી હતી અથવા ડાયવર્ટ કરવી પડી હતી.
યુદ્ધવિરામ અમલમાં આવ્યા પછી, ઇઝરાયલ ડિફેન્સ ફોર્સ (IDF) એ જાહેર સ્થળો, શાળાઓ અને ઓફિસો પરના પ્રતિબંધો હટાવી દીધા છે. આ પગલાથી પ્રદેશમાં સામાન્યતા પુન:સ્થાપિત કરવામાં નોંધપાત્ર ફાળો મળ્યો છે. ટાટા ગ્રુપની માલિકીની એર ઇન્ડિયા અને એર ઇન્ડિયા એક્સપ્રેસે મંગળવારથી પશ્ચિમ એશિયા માટે તેમની ફ્લાઇટ્સ ફરી શરૂ કરી.
એર ઇન્ડિયાએ દિલ્હી-દુબઇ અને એર ઇન્ડિયા એક્સપ્રેસ દિલ્હી-મસ્કત સેવાઓ ફરી શરૂ કરી છે. એરલાઇને જણાવ્યું હતું કે તે પશ્ચિમ એશિયાના 13 શહેરોમાં દર અઠવાડિયે લગભગ 900 ફ્લાઇટ્સનું સંચાલન કરે છે.જેમાં દુબઇ, અબુ ધાબી, શારજાહ, અલ આઇન અને રાસ અલ ખૈમાહ જેવા મુખ્ય યુએઈ શહેરોનો સમાવેશ થાય છે. આ ફ્લાઇટ્સ 25 જૂનથી સંપૂર્ણપણે પુન:સ્થાપિત કરવાની યોજના છે.
