Jamnagar તા. 24
જામનગર મહાનગરપાલિકાએ સલામતીને પ્રાથમિકતા આપતાં એક નવો નિર્ણય લીધો છે. હવેથી મહાનગરપાલિકાના પરિસરમાં આવતા દરેક દ્વિચક્રી વાહન ચાલક અને પાછળ બેઠેલા વ્યક્તિએ ફરજિયાત હેલ્મેટ પહેરવું પડશે. આ નિર્ણય રાજ્ય સરકારના આદેશને અનુસરીને લેવામાં આવ્યો છે. રાજ્ય સરકારનું માનવું છે કે, હેલ્મેટ પહેરવાથી માર્ગ અકસ્માતોમાં થતી ગંભીર ઈજાઓ અને મૃત્યુને ઘટાડવામાં મદદ મળશે.
જામનગર મહાનગરપાલિકાએ આ નિયમનું પાલન કરાવવા માટે મુખ્ય પ્રવેશ દ્વારો પર સુરક્ષા ગાર્ડની વ્યવસ્થા કરી છે. મુખ્ય પ્રવેશ દ્વારો જેવા કે, મુખ્ય વહીવટ ભવનના બન્ને પ્રવેશ દ્વાર અને ભીડભંજન મંદિર ગેઈટ પર બે-બે સુરક્ષા ગાર્ડની ફરજ મૂકવામાં આવી છે. આ ગાર્ડ હેલ્મેટ વગરના વાહનચાલકોને પ્રવેશ આપશે નહીં. મહાનગરપાલિકાના તમામ અધિકારીઓ અને કર્મચારીઓને પણ આ નિયમનું પાલન કરવા આદેશ કરવામાં આવ્યો છે.
આ નિયમનો હેતુ માત્ર કાયદો લાગુ કરવાનો જ નથી, પરંતુ નાગરિકોની સુરક્ષાને સુનિશ્ચિત કરવાનો પણ છે. મહાનગરપાલિકાના આ નિર્ણયને નાગરિકો દ્વારા સકારાત્મક પ્રતિસાદ મળવાની શક્યતા છે. કારણ કે, હેલ્મેટ પહેરવું એ માત્ર વ્યક્તિની જ નહીં પરંતુ સમાજની સુરક્ષા માટે પણ જરૂરી છે. આ નિર્ણયથી માર્ગ અકસ્માતોમાં ઘટાડો થશે અને જીવન બચાવી શકાશે.
