Jamnagar,તા.16
જામનગર જિલ્લામાં મહિલા અને બાળ અધિકારીની કચેરી દ્વારા બેટી બચાવો બેટી પઢાઓ અભિયાનને વેગ મળ્યો છે. આ અંતર્ગત આંતરરાષ્ટ્રીય બાલિકા દિવસ નિમિત્તે જી.જી. હોસ્પિટલ ખાતે વ્હાલી દિકરી વધામણા કીટ ના વિતરણ નો કાર્યક્રમ યોજાયો હતો. આ કાર્યક્રમમાં જામનગર જિલ્લા કલેક્ટર ભાવિન પંડયાએ ઉપસ્થિત રહી નવી જન્મેલી દિકરીઓના જન્મને પ્રોત્સાહન આપવા વ્હાલી દિકરી વધામણા કીટનું વિતરણ કર્યું હતું. આ કીટમાં બાળકી માટે જરૂરી પ્રાથમિક વસ્તુઓનો સમાવેશ કરવામાં આવ્યો હતો.
ઉપરાંત, કલેક્ટરે મહિલા અને બાળ વિકાસની કચેરી સખી વન સ્ટોપ સેન્ટરની મુલાકાત લીધી હતી. આ દરમિયાન મહિલા અને બાળ વિકાસની યોજનાના લાભાર્થીઓને વ્હાલી દિકરી યોજનાના ઓર્ડરની મંજૂરી હુકમનું વિતરણ કરવામાં આવ્યું હતું. સાથે જ વ્હાલી દિકરી વધામણા કીટનું પણ વિતરણ કરવામાં આવ્યું હતું. કલેક્ટરના વરદ હસ્તે વ્હાલી દિકરી યોજનાના આ પહેલને મહિલા અને બાળ અધિકારી ડૉ. પૂજાબેન ડોડીયા તથા તેમની સખી વન સ્ટોપ સેન્ટરની ટીમ દ્વારા આવકારવામાં આવ્યો હતો.
