New York, તા.15
ડોનલ્ડ ટ્રમ્પ ફરી પ્રેસિડેન્ટ બન્યા ત્યારે તેમણે NBC ન્યૂઝને આપેલા એક ઈન્ટરવ્યુમાં એવા દાવા કર્યા હતા કે ગ્રોસરી સસ્તી કરવાનું વચન આપી તેમણે ઈલેક્શનમાં જીત મેળવી છે. ટ્રમ્પે એવા પણ દાવા કર્યા હતા કે અમેરિકાના લોકોને હવે ગ્રોસરી માટે વધારે કિંમત નહીં ચૂકવવી પડે અને તેમના ભાવ ઝડપથી નીચે આવશે.
જોકે, ટ્રમ્પની સેક્નડ ટર્મ શરૂ થયાને હવે દસ મહિના પૂરા થવા આવ્યા છે પરંતુ અત્યારસુધી યુએસમાં ગ્રોસરી સસ્તી થવાને બદલે સતત મોંઘી થતી રહી છે અને આગામી દિવસોમાં તેના ભાવમાં જંગી ઉછાળો આવે તેવી શક્યતા છે. આ શક્યતા બીજા કોઈએ નહીં પરંતુ ખુદ લેબર ડિપાર્ટમેન્ટે પોતાના એક અસેસમેન્ટમાં વ્યક્ત કરી છે.
ટેરિફને કારણે બહારથી આવતા શાકભાજી અને અનાજના ભાવ વધ્યા જ છે પરંતુ તેની સાથે-સાથે હવે માસ ડિપોર્ટેશનને કારણે સર્જાયેલી લેબર ક્રાઈસિસને લીધે પણ ગ્રોસરીના ભાવમાં ભડકો થવાની શક્યતા સેવાઈ રહી છે. લેબર ડિપાર્ટમેન્ટનું કહેવું છે કે ઈમિગ્રેશન ક્રેકડાઉનને કારણે ખેતરોમાં કામ કરવા માટે મજૂરો નથી મળી રહ્યા અને તેને લીધે એગ્રિકલ્ચર પ્રોડક્શન પર સીધી અસર પડે તેવી શક્યતા છે.
એક રિપોર્ટ અનુસાર માઈગ્રન્ટ એગ્રિકલ્ચર વર્કર્સના અભાવને કારણે અમેરિકન ફુડ સપ્લાય પર તાત્કાલિક ખતરો ઉભો થવાની શક્યતા છે. આ રિપોર્ટમાં એવું પણ કહેવામાં આવ્યું છે કે અમેરિકન વર્કર્સને ખેતરોમાં કામ કરવામાં કોઈ રસ નથી કે ના તો તેમનામાં આ કામ કરવાની કોઈ સ્કીલ છે.
ચાર-પાંચ મહિનાથી ટેક્સસ, ફ્લોરિડા અને કેલિફોર્નિયા સહિતના મોટાપાયે ખેતીલાયક જમીન ધરાવતા રાજ્યોના ખેડૂતો કહી રહ્યા છે. જૂન-જુલાઈમાં ટ્રમ્પ એડમિનિસ્ટ્રેશને કેલિફોર્નિયામાં ખેતરોમાં મોટાપાયે ઈમિગ્રેશન રેડ કરાવતા મજૂરોમાં ડરનો માહોલ ઉભો થયો હતો અને મોટી સંખ્યામાં પલાયન પણ શરૂ થયું હતું.
