London, તા.11
લંડનમાં સોમવારે સાંજે પાંચ પુરૂષ અને બે મહિલા સહિત સાત ક્રિકેટર્સને ICC હોલ ઓફ ફેમથી સન્માનિત કરવાની જાહેરાત કરવામાં આવી હતી. આ કાર્યક્રમમાં મેથ્યુ હેડન (ઑસ્ટ્રેલિયા), ગ્રેમ સ્મિથ (સાઉથ આફ્રિકા), હાશિમ અમલા (સાઉથ આફ્રિકા), ડેનિયલ વેટોરી (ન્યુ ઝીલેન્ડ) અને સના મીર (પાકિસ્તાન) આ સન્માન સ્વીકારવા માટે હાજર રહ્યાં હતાં.
જ્યારે ભૂતપૂર્વ ભારતીય ક્રિકેટર મહેન્દ્ર સિંહ ધોની અને ઇંગ્લેન્ડની ભૂતપૂર્વ વિકેટકીપર-બેટર સારાહ ટેલર કાર્યક્રમમાં આવી શક્યાં નહોતાં.હોમટાઉન રાંચીમાં પોતાના ડેઈલ રૂટીનમાં વ્યસ્ત ધોની કયા કારણે લંડન ન ગયો એનું સ્પષ્ટ કારણ સામે આવ્યું નથી, પણ આ કાર્યક્રમના બીજા જ દિવસે ગઈકાલે તે ઝારખંડ સ્ટેટ ક્રિકેટ અસોસિએશનના જિમમાં જોવા મળ્યો હતો.
જ્યાં અસોસિએશન દ્વારા તેને ફૂલોનો બુકે આપીને અભિનંદન પાઠવવામાં આવ્યા હતા. ધોની આ સન્માન મેળવનાર ભારતનો નવમો પુરૂષ ક્રિકેટર અને ઓવરઓલ અગિયારમો ક્રિકેટર બન્યો છે.
ઝારખંડ સ્ટેટ ક્રિકેટ અસોસિએશને એમ. એસ. ધોનીને ICC હોલ ઑફ ફેમમાં સામેલ થવા બદલ અભિનંદન પાઠવ્યા.2009થી આ સન્માન અવિશ્વનીય સિદ્ધિઓ મેળવનાર ક્રિકેટર્સને આપવામાં આવે છે. જેણે છેલ્લે પાંચ વર્ષ કે એથી વધુ સમય પહેલાં છેલ્લી ઈન્ટરનેશનલ મેચ રમી હોય તેને જ આ સન્માન માટે માન્ય ગણવામાં આવે છે. હમણાં સુધી 122 ક્રિકેટર્સને આ સન્માન મળ્યું છે.
બિશન સિંહ બેદી (2009), કપિલ દેવ (2009), સુનીલ ગાવસ્કર (2009), અનિલ કુંબલે (2015), રાહુલ દ્રવિડ (2018), સચિન તેન્ડુલકર (2019), વિનુ માંકડ (2021), વીરેન્દર સેહવાગ (2023), જયના એદલજી (2023), નીતુ ડેવિડ (2024), એમ. એસ. ધોની (2025).
” ICC હોલ ઓફ ફેમમાં સ્થાન મેળવવું એ એક સન્માનની વાત છે જે વિશ્વભરના ક્રિકેટરોની વિવિધ પેઢીઓના યોગદાનને માન્યતા આપે છે. આવા સર્વકાલીન મહાન પ્લેયર્સ સાથે તમારું નામ યાદ રાખવું એ એક અદ્ભુત અનુભૂતિ છે. એ એવી વસ્તુ છે જેને હું હંમેશાં યાદ રાખીશ.”: – એમ. એસ. ધોનીનું નિવેદન
