Tamil Nadu, તા.1
કહેવાય છે કે શીખવાની કોઈ ઉમર નથી હોતી. તેઓ જ એક કિસ્સો સામે આવ્યો છે.તમિલનાડુના તેનકાસીની એક અનોખી માતા-પુત્રી જોડીએ આ વર્ષે – NEET પાસ કરી છે. અમુથાવલી નામની મહિલાએ આ વર્ષે પહેલીવાર તેની પુત્રી સાથે NEET પરીક્ષા આપી હતી.
આ પ્રેરણાદાયી વાર્તાનું મુખ્ય પાત્ર, અમુથાવલી વ્યવસાયે ફિઝિયોથેરાપિસ્ટ છે, જેણે દવાનો અભ્યાસ કરવાના તેના 15 વર્ષ જૂના સ્વપ્નને પૂર્ણ કરવાનું નક્કી કર્યું.
વ્યક્તિગત અને આર્થિક મુશ્કેલીઓને કારણે, તેણીને પોતાનું સ્વપ્ન પૂર્ણ કરવાની તક મળી નહીં. હવે માતા અને પુત્રી બંને આ વર્ષે એમબીબીએસની સફર શરૂ કરવા જઈ રહી છે. નેશનલ એલિજિબિલિટી-કમ-એન્ટ્રન્સ ટેસ્ટ (NEET )ની તૈયારીમાં પોતાની પુત્રીને મદદ કરતી વખતે, 49 વર્ષીય અમુથાવલીએ પોતે પરીક્ષા આપવાનું નક્કી કર્યું.
અમુથાવલીએ કહ્યું- હું વર્ષોથી ફિઝિયોથેરાપિસ્ટ તરીકે કામ કરી રહી છું, પરંતુ હું હંમેશા ડોકટર બનવા માગતી હતી પરંતુ મને ક્યારેય તક મળી નહીં. જ્યારે મેં મારી પુત્રી સાથે તૈયારી શરૂ કરી, ત્યારે મને સમજાયું કે હવે નહીં તો ક્યારેય નહીં. તેણીએ મને ફરીથી પ્રયાસ કરવાની હિંમત આપી.
અમુથાવલીએ NEET માં દિવ્યાંગ વ્યક્તિઓ (PWD) શ્રેણી હેઠળ 147 ગુણ મેળવ્યા. તેણીને વિરુધુનગરની સરકારી મેડિકલ કોલેજમાં પ્રવેશ મળ્યો છે. તેની પુત્રી સંયુક્તા કૃપાલિનીએ તે જ પરીક્ષામાં 460 ગુણ મેળવ્યા છે.
