Ahmedabad,તા.4
મુંબઈ-અમદાવાદ બુલેટ ટ્રેન પ્રોજેક્ટ માટે ગુજરાતના નડિયાદ નજીક NH-48 52 2 x 100 મીટર લાંબા લોખંડના પુલનો બીજો સ્પાન સફળતાપૂર્વક લોન્ચ કરવામાં આવ્યો છે. આ પુલ ગુજરાતમાં આયોજિત 17 લોખંડના પુલમાંથી નવમો છે, જેનું કામ પૂર્ણ થયું છે.
આ પુલનો પહેલો સ્પાન એપ્રિલ 2025માં જ પૂરો થઈ ગયો હતો.
આ 200 મીટર લાંબો પુલ અનેક રીતે ખાસ છે…..
વજન અને માપઃ તેનું વજન લગભગ 2,884 મેટ્રિક ટન છે,
ઊંચાઈ :14.6 મીટર અને પહોળાઈ 14.3 મીટર છે.
આયુષ્યઃ આ પુલને 100 વર્ષના લાંબા આયુષ્ય માટે ડિઝાઇન કરવામાં આવ્યો છે.
નિર્માણઃ તેનું ફેબ્રિકેશન ઉત્તર પ્રદેશના હાપુર નજીક સલસર ખાતે કરવામાં આવ્યું છે.
ટેકનિકલ પાસાંઃ પુલના નિર્માણમાં 1,14,172 હાઈ સ્ટ્રેન્થ બોલ્ટ્સ અને ઇલાસ્ટોમેરિક બેરિંગ્સનો ઉપયોગ કરવામાં આવ્યો છે. લોન્ચિંગ માટે અર્ધ-સ્વચાલિત જેક્સ અને સ્વચાલિત મિકેનિઝમનો ઉપયોગ થયો હતો, જેનાથી કામગીરી સરળ બની.
NH-48, જે દિલ્હી, મુંબઈ અને ચેન્નઈને જોડે છે, તે દેશના સૌથી વ્યસ્ત હાઈવેમાંનો એક છે. પુલના બીજા સ્પાનને હાઈવે પરની ત્રણ લેન પરથી 100 મીટર સુધી સરકાવીને લોન્ચ કરવામાં આવ્યો હતો. આ લોન્ચિંગનું આયોજન એવી રીતે કરવામાં આવ્યું હતું કે ટ્રાફિકને કોઈ મોટી અડચણ ન આવે અને વાહનચાલકોને ઓછામાં ઓછી અસુવિધા થાય.
સમગ્ર કોરિડોરમાં કુલ 28 લોખંડના પુલનું નિર્માણ થવાનું છે, જેમાંથી 11 મહારાષ્ટ્રમાં અને 17 ગુજરાતમાં બનશે. આ પ્રોજેક્ટ ભારતના ઇન્ફ્રાસ્ટ્રક્ચર વિકાસમાં એક મહત્વપૂર્ણ સીમાચિહ્નરૂપ છે.
