Ahmedabad,તા.૮
નેશનલ ફિલ્મ અવોર્ડ્સના ઇતિહાસમાં એક મોટો ફેરફાર થવાનો છે. ૭૨ વર્ષમાં પહેલીવાર આ અવોર્ડ સમારોહ દિલ્હીની બહાર યોજાશે. આ વર્ષે આ કાર્યક્રમ ૨૨ સપ્ટેમ્બરના રોજ ગુજરાતના કેવડિયા એકતા નગર ખાતે યોજાશે. રાષ્ટ્રપતિ દ્રૌપદી મુર્મુ વિજેતાઓને પુરસ્કારો પ્રદાન કરશે. તેઓ આ મહિનાના અંતમાં ગુજરાતની મુલાકાત દરમિયાન નેશનલ ફિલ્મ અવોર્ડ્સ આપશે.
નેશનલ ફિલ્મ અવોર્ડ્સની સ્થાપના ૧૯૫૪માં કરવામાં આવી હતી. ઉદ્ઘાટન સમારોહ દિલ્હીના વિજ્ઞાન ભવનમાં યોજાયો હતો અને ત્યારબાદના મોટાભાગના સમારોહ પણ ત્યાં જ યોજાયા છે. પરિણામે ૭૨મા નેશનલ ફિલ્મ અવોર્ડ્સનું દિલ્હીની બહાર આયોજન એક મહત્વપૂર્ણ પરિવર્તન છે. ૭૨ વર્ષમાં આ પહેલીવાર હશે કે આ કાર્યક્રમ નવી દિલ્હીને બદલે ગુજરાતમાં યોજાશે.અધિકારીઓના જણાવ્યા અનુસાર, આ વખતે કેવડિયામાં સમારોહનું આયોજન કરવાનો નિર્ણય લેવામાં આવ્યો હતો.
ગુજરાતના એકતા નગરની વાત કરીએ તો, આ શહેર ’સ્ટેચ્યુ ઓફ યુનિટી’ તરીકે ઓળખાય છે, જ્યાં વિશ્વની સૌથી ઊંચી પ્રતિમા આવેલી છે. ૫૯૭ ફૂટ ઊંચી આ પ્રતિમા સરદાર વલ્લભભાઈ પટેલની છે. વડાપ્રધાન નરેન્દ્ર મોદીએ ૨૦૧૮માં તેનું ઉદ્ઘાટન કર્યું હતું.
’આર્ટિકલ ૩૭૦’એ શ્રેષ્ઠ ફીચર ફિલ્મનો એવોર્ડ જીત્યો છે અને તેની મુખ્ય અભિનેત્રી યામી ગૌતમને શ્રેષ્ઠ અભિનેત્રી તરીકે પસંદ કરવામાં આવી છે. મલયાલમ સુપરસ્ટાર મામૂટી અને બોલિવૂડ સ્ટાર કાર્તિક આર્યનને અનુક્રમે ’બ્રહ્મયુગમ’ અને ’ચંદુ ચેમ્પિયન’માં તેમની ભૂમિકાઓ માટે શ્રેષ્ઠ અભિનેતાનો એવોર્ડ મળશે. અભિનેતા-ફિલ્મ નિર્માતા રણદીપ હુડાને વિનાયક દામોદર સાવરકરની બાયોપિક ’સ્વતંત્ર્ય વીર સાવરકર’ માટે શ્રેષ્ઠ નવોદિત દિગ્દર્શકનો એવોર્ડ આપવામાં આવશે.
તેલુગુ સાયન્સ ફિક્શન ફિલ્મ ’કલ્કી ૨૮૯૮ એડી’ને શાનદાર મનોરંજન પૂરું પાડનારી સૌથી લોકપ્રિય ફિલ્મ માટે એવોર્ડ મળશે, જ્યારે અરુણ માથેશ્વરન દ્વારા દિગ્દર્શિત અને મુખ્ય ભૂમિકામાં ધનુષ અભિનીત તમિલ ફિલ્મ ’કેપ્ટન મિલર’ને રાષ્ટ્રીય, સામાજિક અને પર્યાવરણીય મૂલ્યોને પ્રોત્સાહન આપતી શ્રેષ્ઠ ફીચર ફિલ્મ તરીકે પસંદ કરવામાં આવી છે.
