Rajkot , તા.17
રાજકોટમાં કાયદો વ્યવસ્થા કથળી હોય તેમ દિન પ્રતિદિન ગુનાઓ વધતાં જઈ રહ્યાં છે. ત્યારે રાજકોટના વડાળી ગામની લોહિયાળ ઘટના સામે આવી છે. પરીવારની હાજરીમાં જ જાહેરમાં કાકાને ભત્રીજાએ છરીના ઘા ઝીંકી મોતને ઘાટ ઉતાર્યા હતાં. મોબાઈલમાં સ્ટેટ્સ રાખવા બાબતે ઝઘડો થયાં બાદ મામલો હત્યા સુધી પહોંચ્યો હતો. બનાવ અંગે આજીડેમ પોલીસે હત્યાની કલમ હેઠળ ગુનો નોંધી સગીર આરોપીને સકંજામાં લીધો હતો.
બનાવ અંગે રાજકોટના વડાળી ગામમાં પાડાસણ જવાના રોડ પર રહેતાં મયુરભાઈ રાજાભાઈ મૂછડીયા (ઉ.વ.31) એ નોંધાવેલ ફરીયાદમાં આરોપી તરીકે એક સગીર વયના શખ્સનું નામ આપી જણાવ્યું હતું કે, તેના કૌટુંબિક ભાઈ ભરતભાઇ નાગજીભાઈ મૂછડીયા (ઉ.વ.32) વડાળી ગામમાં જ રહે છે અને મજૂરીકામ કરે છે. ભરતભાઇની પડોશમાં જ તેમનો કૌટુંબિક ભત્રીજો રહે છે. જે સગીર વયનો છે. બંને અવારનવાર શેરીમાં આવેલ પાન બીડીની દુકાને બેસતાં હોય છે.
ત્યારે ગઈકાલે પણ બંને શેરીમાં આવેલ દુકાને બેઠાં હતાં ત્યારે મોબાઈલમાં સ્ટેટ્સ રાખવા મામલે બંને વચ્ચે સામાન્ય ઝઘડો થયો હતો. જેથી દુકાન માલિકે બંનેને ઝઘડો ન કરવા અને ત્યાંથી જતાં રહેવા માટે કહ્યું હતું. જે બાદ બંનેના પરિવારજનો પણ ત્યાં દોડી આવ્યાં હતાં. બાદમાં બંને પોતપોતાના ઘરે ચાલ્યાં ગયેલ હતાં.
ભરત મૂછડીયા પોતાના પરીવાર સાથે ઘર નજીક ઉભો હતો ત્યારે આરોપી સગીર પોતાના ઘરમાંથી છરી લઈ ઘસી આવ્યો હતો અને કોઈ કાંઈ સમજે તે પહેલાં જ ભરત પર છરી વડે હુમલો કરી એક ઘા પડખામાં અને એક ઘા આંખ પાસે ઝીંકી દઈ નાસી છૂટ્યો હતો.
ઘાયલ થયેલ યુવાન ત્યાં જ ઢળી પડ્યો હતો. ત્યાં હાજર પરિવારજનોએ તુરંત સારવારમાં સિવિલ હોસ્પિટલમાં ખસેડેલ પરંતુ સારવાર મળે તે પહેલાં જ યુવાને દમ તોડી દેતાં બનાવ હત્યામાં પલટયો હતો. બનાવની જાણ થતાં આજીડેમ પોલીસ મથકનો સ્ટાફ સિવિલ હોસ્પિટલમાં દોડી આવ્યો હતો અને જરૂરી કાર્યવાહી કરી મૃતદેહને પીએમમાં ખસેડી તપાસ હાથ ધરી હતી.
બનાવ અંગેની ફરીયાદ પરથી આજીડેમ પોલીસે હત્યાની કલમ હેઠળ ગુનો નોંધ્યો હતો. હત્યા કરી નાસી છૂટેલા સગીરને ક્રાઈમ બ્રાન્ચની ટીમે સકંજામાં લીધો હતો. મૃતક બે બહેનનો એક નો એક ભાઈ અને પરીવારનો આધાર સ્તંભ હતો. તેમજ બે પુત્રોએ પિતાની છત્રછાયા ગુમાવતાં પરીવારમાં કલ્પાંત છવાયો હતો.
