Islamabad,તા.૨૯
પાકિસ્તાનના વડા પ્રધાન શાહબાઝ શરીફે ફરી એકવાર ભારત સાથે વાતચીત કરવાની ઇચ્છા વ્યક્ત કરતા કહ્યું કે બંને પક્ષોએ સાથે બેસીને કાશ્મીર, પાણી અને આતંકવાદ સહિતના તમામ મુદ્દાઓનું નિરાકરણ લાવવું જોઈએ. શરીફે અઝરબૈજાનના લાચિનમાં પાકિસ્તાન-તુર્કી-અઝરબૈજાન ત્રિપક્ષીય શિખર સંમેલનને સંબોધિત કરતી વખતે આ ટિપ્પણી કરી. રાષ્ટ્રપતિ રેસેપ તૈયપ એર્દોગન અને ઇલ્હમ અલીયેવે પણ આ પરિષદમાં હાજરી આપી હતી.
ભારત અને પાકિસ્તાન વચ્ચે વાટાઘાટો પર ભાર મૂકતા આ અઠવાડિયે શાહબાઝનું આ બીજું નિવેદન હતું. અગાઉ, શરીફે સોમવારે તેહરાનમાં કહ્યું હતું કે તેઓ ’બધા વિવાદોના ઉકેલ’ માટે ભારત સાથે વાટાઘાટો કરવા તૈયાર છે. ભારતે સ્પષ્ટ કર્યું છે કે તે પાકિસ્તાન સાથે ફક્ત પાકિસ્તાન કબજા હેઠળના કાશ્મીર પરત ફરવા અને આતંકવાદના મુદ્દા પર જ વાટાઘાટો કરશે.
’ડોન’ અખબારે લાચીનમાં ત્રિપક્ષીય શિખર સંમેલનમાં શરીફના શબ્દો ટાંકીને કહ્યું હતું કે, “આપણે સાથે બેસીને શાંતિ માટે વાત કરવી જોઈએ. એવા મુદ્દાઓ છે જેના પર તાત્કાલિક ધ્યાન આપવાની જરૂર છે અને તેનો ઉકેલ વાતચીત દ્વારા લાવવો જોઈએ. તેમણે કહ્યું, “મેં પૂરી નમ્રતાથી કહ્યું છે કે આપણે પ્રદેશમાં શાંતિ ઇચ્છીએ છીએ અને આ માટે, એવા મુદ્દાઓ પર વાતચીત થવી જોઈએ જેના પર તાત્કાલિક ધ્યાન આપવાની જરૂર છે, તે કાશ્મીરનો મુદ્દો છે જે સંયુક્ત રાષ્ટ્ર અને સુરક્ષા પરિષદના ઠરાવો અનુસાર છે અને કાશ્મીરના લોકોની આકાંક્ષાઓ અનુસાર છે.”
શરીફે કહ્યું, “મેં પૂરી ગંભીરતાથી કહ્યું છે કે જો ભારત આતંકવાદ સામે લડવાના ઉદ્દેશ્ય સાથે નિષ્ઠાપૂર્વક વાત કરવા માંગે છે, તો પાકિસ્તાન આ મુદ્દા પર પણ ભારત સાથે વાત કરવા તૈયાર છે.” શરીફે ભારત સાથે વેપાર ફરી શરૂ કરવાની ઇચ્છા પણ વ્યક્ત કરી. તેમણે સિંધુ જળ સંધિને સ્થગિત કરવાના ભારતના નિર્ણયની પણ ટીકા કરી અને કહ્યું કે તે પાકિસ્તાનના લોકો માટે તેમના કૃષિ ઉપયોગ, પીવાના પાણી અને અન્ય ઘણા હેતુઓ માટે જીવનરેખા છે.
૨૨ એપ્રિલે પહેલગામમાં થયેલા આતંકવાદી હુમલા બાદ ભારત અને પાકિસ્તાન વચ્ચે તણાવ વધી ગયો હતો. આ હુમલામાં ૨૬ લોકોએ જીવ ગુમાવ્યા હતા. ભારતે ૬ મેની રાત્રે ’ઓપરેશન સિંદૂર’ હેઠળ પાકિસ્તાન અને પાકિસ્તાન અધિકૃત કાશ્મીરમાં આતંકવાદી માળખા પર સચોટ હુમલા કર્યા હતા. આ પછી, પાકિસ્તાને ૮, ૯ અને ૧૦ મેના રોજ ભારતીય લશ્કરી ઠેકાણાઓ પર હુમલો કરવાનો પ્રયાસ કર્યો હતો. ભારતીય પક્ષે પાકિસ્તાની કાર્યવાહીનો કડક જવાબ આપ્યો હતો. ૧૦ મેના રોજ, બંને પક્ષોના લશ્કરી કામગીરીના મહાનિર્દેશકો વચ્ચેની વાતચીત પછી, લશ્કરી કાર્યવાહી રોકવા માટે એક કરાર થયો હતો.
