Delhi, તા.20
ન્યુ દિલ્હી મ્યુનિસિપલ કાઉન્સિલ (NDMC)એ વડા પ્રધાનની 75મી વર્ષગાંઠની ઊજવણી અંતર્ગત થનારા સેવા પર્વના ભાગરૂપે ગઈ કાલે સામૂહિક લાઇવ પેઇન્ટિંગ ઇવેન્ટ યોજી હતી.
એમાં 35,000થી વધુ કલાકારોએ 10 કિલોમીટર લાંબા કેન્વસ પર પેઇન્ટિંગ કરીને વિશ્વવિક્રમ સરજ્યો હતો. સવારે 10થી બપોરે એક વાગ્યા દરમ્યાન કલાકારોએ કર્તવ્યપથની દીવાલોને કેન્વસ બનાવીને એના પર પેઇન્ટિંગ કર્યું હતું.
આ આર્ટ-ઇવેન્ટની થીમ હતી ‘વિકસિત ભારત કે રંગ કલા કે સંગ’. ત્રિવેણી કલા સંગમ અને દિલ્હી યુનિવર્સિટીના સહયોગથી NDMC દ્વારા આ કાર્યક્રમનું આયોજન કરવામાં આવ્યું હતું.
દિલ્હીનાં મુખ્ય પ્રધાન રેખા ગુપ્તાએ કહ્યું હતું કે ‘પહેલી વાર રાજધાનીમાં આવું આયોજન થયું છે જ્યાં ભારતનાં વિવિધ રાજ્યોના હજારો પ્રસિદ્ધ કલાકારોએ 10 કિલોમીટર લાંબા કેન્વસ પર ભારતના વિકાસનું સપનું ઉજાગર કર્યું હોય.’
