New Delhi,તા.૧૭
વડા પ્રધાન નરેન્દ્ર મોદીએ શુક્રવારે હરિયાણાના જીંદથી દિલ્હી-અમૃતસર-કટરા એક્સપ્રેસવેના હરિયાણા સેક્શનનું ઉદ્ઘાટન કરીને રાષ્ટ્રને એક મોટી ભેટ આપી. આ ગ્રીનફિલ્ડ એક્સપ્રેસવે ખુલવાથી, દિલ્હીથી માતા વૈષ્ણોદેવીના મંદિર સુધીની મુસાફરી પહેલા કરતા ઘણી સરળ અને ઝડપી બનશે. આ પ્રોજેક્ટ ઉત્તર ભારતમાં રોડ કનેક્ટિવિટી, પર્યટન અને ઉદ્યોગને નવી ગતિ આપશે તેવી અપેક્ષા છે.
વડાપ્રધાન કાર્યાલય અનુસાર, એક્સપ્રેસવે પૂર્ણ થયા પછી, દિલ્હીથી કટરા સુધીનો પ્રવાસ સમય આશરે ૧૪ કલાકથી ઘટીને માત્ર ૬ કલાક થઈ જશે. દિલ્હીથી અમૃતસર સુધીની મુસાફરી આશરે ૮ કલાકથી ઘટીને ૪ કલાક થઈ જશે. આનાથી પ્રવાસીઓ માટે સમય અને બળતણ બંનેની બચત થશે.
વડાપ્રધાન મોદીએ હરિયાણામાં આ એક્સપ્રેસવેના ૧૫૭.૯૨ કિલોમીટર લાંબા ચાર-લેન પેકેજ ૧ થી ૫નું ઉદ્ઘાટન કર્યું. આશરે ૯,૬૮૦ કરોડના ખર્ચે બનેલ, આ ભાગ ૬૬૭ કિલોમીટર લાંબા દિલ્હી-અમૃતસર-કટરા એક્સપ્રેસવેનો એક મહત્વપૂર્ણ ભાગ છે.
આ નવા એક્સપ્રેસવેના ઉદઘાટનથી રાષ્ટ્રીય ધોરીમાર્ગ ૪૪ પર ટ્રાફિકની ભીડ ઓછી થશે. આનાથી શ્રી માતા વૈષ્ણોદેવીની યાત્રા કરતા યાત્રાળુઓ, પ્રવાસીઓ અને વેપારીઓને નોંધપાત્ર રાહત મળશે. તેનાથી હરિયાણા, પંજાબ અને જમ્મુ અને કાશ્મીર વચ્ચે આર્થિક પ્રવૃત્તિમાં પણ વધારો થવાની અપેક્ષા છે.
આ એક્સપ્રેસવે ફક્ત મુસાફરીને સરળ બનાવશે નહીં પરંતુ આસપાસના વિસ્તારમાં ઔદ્યોગિક વિકાસ, વેરહાઉસિંગ અને લોજિસ્ટિક્સ ક્ષેત્રોને પણ મોટો વેગ આપશે. સુધારેલ રોડ કનેક્ટિવિટી માલ પરિવહનને ઝડપી બનાવશે અને વ્યવસાયિક ખર્ચ ઘટાડશે.
વડાપ્રધાન મોદીએ હરિયાણા, પંજાબ અને ચંદીગઢમાં અનેક રોડ, રેલ, આરોગ્ય અને શિક્ષણ પ્રોજેક્ટ્સનું ઉદ્ઘાટન અને શિલાન્યાસ પણ કર્યો. આમાં દેશની પ્રથમ હાઇડ્રોજન ટ્રેનને લીલી ઝંડી આપવી, અમૃત ભારત સ્ટેશન યોજના હેઠળ વિકસિત નવા હાઇવે પ્રોજેક્ટ્સ, મેડિકલ કોલેજો અને રેલ્વે સ્ટેશનોનું ઉદ્ઘાટન શામેલ હતું. આ એક્સપ્રેસવેનું ઉદ્ઘાટન ઉત્તર ભારતમાં ઝડપી, સુરક્ષિત અને આધુનિક રોડ નેટવર્ક તરફ વધુ એક મોટું પગલું છે.
