Codorus,તા.૧૮
દક્ષિણ પેન્સિલવેનિયાના નોર્થ કોડોરસ ટાઉનશીપમાં બુધવારે ગોળીબારની ઘટનામાં ત્રણ પોલીસ અધિકારીઓની હત્યાના કારણે હોબાળો મચી ગયો છે. ઘટનાનો વિરોધ કરવા લોકો રસ્તા પર ઉતરી આવ્યા છે. ઘટના બાદ પેન્સિલવેનિયાના એક શેરીમાં મોડી રાત સુધી વિરોધ પ્રદર્શન ચાલુ રહ્યા.પ્રારંભિક પોલીસ અહેવાલો અનુસાર, પોલીસ ઘરેલુ વિવાદની તપાસ કરવા પહોંચી ત્યારે ગોળીબાર થયો. ત્રણ અધિકારીઓ માર્યા ગયા અને બે અન્ય ગંભીર રીતે ઘાયલ થયા. પોલીસે વળતો જવાબ આપ્યો અને હુમલાખોરને સ્થળ પર જ મારી નાખ્યો.
આ ઘટના ફિલાડેલ્ફિયાથી આશરે ૧૮૫ કિલોમીટર પશ્ચિમમાં અને મેરીલેન્ડ સરહદ નજીક બની હતી. પોલીસ અધિકારીઓની એક ટીમ ઘરેલુ વિવાદની તપાસ માટે ઘટનાસ્થળે પહોંચી હતી ત્યારે તેમના પર અચાનક ગોળીબાર કરવામાં આવ્યો. સ્થાનિક અધિકારીઓ અને રાજ્ય વહીવટીતંત્રે આ દુઃખદ ઘટનાની પુષ્ટિ કરી છે. જોકે, હુમલાખોર અને મૃતક અધિકારીઓની ઓળખ હજુ સુધી જાહેર કરવામાં આવી નથી. ગોળીબારનું કારણ શું હતું અને અધિકારીઓને કેવી રીતે નિશાન બનાવવામાં આવ્યા તે પણ સ્પષ્ટ નથી.
આ આઘાતજનક ઘટના બાદ, પેન્સિલવેનિયાના ગવર્નર જોશ શાપિરોએ શોક વ્યક્ત કરતાં કહ્યું, “આ કાઉન્ટી અને આપણા દેશની સેવા કરતી વખતે પોતાનો જીવ ગુમાવનારા ત્રણ બહાદુર અધિકારીઓના નિધન પર અમે ખૂબ શોક વ્યક્ત કરીએ છીએ. આ એક મોટું નુકસાન છે.” તેમણે વધુમાં કહ્યું, “આ પ્રકારની હિંસા કોઈપણ સ્વરૂપમાં અસ્વીકાર્ય છે. આપણે એક સમાજ તરીકે વધુ સારું કરવાની જરૂર છે.”ઘટના બાદ, સમગ્ર વિસ્તારમાં સુરક્ષા કડક કરવામાં આવી છે, અને સંપૂર્ણ તપાસ ચાલી રહી છે. આ ઘટના પાછળના સંજોગોને સમજવા માટે એફબીઆઇ અને અન્ય ફેડરલ એજન્સીઓ પણ તપાસમાં સામેલ થઈ છે. સ્થાનિક સમુદાય અને પોલીસ વિભાગ આ નુકસાન પર શોક વ્યક્ત કરી રહ્યા છે. મૃતક અધિકારીઓના માનમાં ટૂંક સમયમાં અંતિમ સંસ્કાર કરવામાં આવશે. ઘાયલોને સ્થાનિક હોસ્પિટલમાં સારવાર આપવામાં આવી રહી છે, જેમાંથી એકની હાલત ગંભીર હોવાનું જાણવા મળ્યું છે. આ ઘટના યુનાઇટેડ સ્ટેટ્સમાં ઘરેલુ હિંસા અને પોલીસ પર હુમલાના વધતા વલણમાં બીજી એક છે, જે કાયદો અને વ્યવસ્થા અને પોલીસ સલામતી અંગે નવા પ્રશ્નો ઉભા કરે છે.
