Vadodara,તા.17
ભાજપ પ્રદેશ સંગઠન મહામંત્રી રત્નાકર આજે વડોદરાની મુલાકાતે આવી રહ્યા છે. તેઓ સાંજે ચાર કલાકે જિલ્લા ભાજપ કાર્યાલય ખાતે મધ્ય ગુજરાતના પાંચ જિલ્લાની બેઠક કરશે.
ભાજપના પ્રદેશ સંગઠન મહામંત્રી રત્નાકર આજે જિલ્લા ભાજપ કાર્યાલય પહોંચવાના છે. તેઓ આજે મધ્ય ગુજરાતના પાંચ જિલ્લાની બેઠક કરવાના છે. જેમાં તાલુકા પંચાયતના પ્રમુખો અને જિલ્લા પંચાયતના, નવા પ્રમુખો સહીત સંગઠનના પદાધિકારીઓ હાજર રહેશે. તેઓ તાલુકા પંચાયતના પદાધિકારીઓ સહિત જિલ્લાના આગેવાનો સાથે ચર્ચા કરશે. સાથે વડોદરા શહેરના નવા નિમાયેલા પ્રમુખ ડો.જયપ્રકાશ સોનીને મળી શકે છે. જિલ્લા ભાજપ પ્રમુખની જાહેરાત હજી સુધી થઈ નથી ત્યારે રત્નાકરની આ મુલાકાત સૂચક બની રહે તેવી શક્યતા છે.
ઉપરાંત આગામી સમયમાં આવનારી જિલ્લા પંચાયત અને ગ્રામ પંચાયતોની ચૂંટણીને અનુલક્ષીને પણ બેઠકમાં ચર્ચા થાય એવી સંભાવના છે. આ બેઠક નવા નિમાયેલા તાલુકા પંચાયતોના પ્રમુખો સાથેની પરિચય બેઠક છે પરંતુ પ્રદેશ સંગઠન મહામંત્રીની મુલાકાત અચાનક ગોઠવાતા શહેર જિલ્લાના રાજકારણમાં ગરમાવો આવી ગયો છે. તેઓ વડોદરા શહેરના નવા સંગઠન બાબતે પણ ચર્ચા કરે તેવી શક્યતા જોવાઈ રહી છે.
