Rajkot.તા.29
કાલાવડ રોડ પર રહેતા વાસુકી સિમેન્ટ પ્રા.લી.ના માલિક બંકિમભાઈ મહેતા સાથે પુનાના પિતા-પુત્રએ રૂ. 5.50 કરોડની ઠગાઈ આચરી લીધાનો બનાવ સામે આવ્યો છે. સિમેન્ટ ગ્રાઈન્ડિંગની મશીનરી ખરીદવા માટે પુનાના બે આરોપીઓ જગદિશ ભક્તાવરમલ ચાંડાક અને તેના પુત્ર અદીતને રૂ. 5.50 કરોડ એડવાન્સ પેટે આપ્યા હતા પરંતુ બંને આરોપીઓએ આજ સુધી મશીનરી કે રકમ નહીં આપી છેતરપીંડી કર્યાની આર્થિક ગુના નિવારણ શાખામાં ફરિયાદ નોંધાવી હતી.
બનાવ અંગે કાલાવડ રોડ પરના પુષ્કરધામ નજીક આવેલ પ્રધ્યુમન રોયલ હાઈટસમાં રહેતાં અને રૈયા ટેલિફોન એક્ષચેંજ સામે નક્ષત્ર હાઈટસમાં વાસુકી સિમેન્ટ પ્રા. લી. નામની કંપનીની ઓફિસ ધરાવતાં બંકીમભાઈ કાંતીલાલ મહેતા (ઉ.વ. 40)એ આર્થિક ગુના નિવારણ શાખામાં નોંધાવેલી ફરિયાદમાં જણાવ્યું હતું કે, તેમણે ભાગીદાર રજનીકાંત જયંતીલાલ ઝાલરીયા સાથે કંપની શરૂ કરી હતી.
સિમેન્ટનું પ્રોડકશન શરૂ કરવા માટે માળિયા-મિયાણાના વરસામેડી ગામે પ્લાન્ટ શરૂ કરવાનો હતો. જે માટે જરૂરી મશીનરી ખરીદવા જામનગરના સિક્કા ખાતે કમળ સિમેન્ટ ફેકટરીમા નોકરી કરતા જગદિશ સાથે ઓળખાણ થઈ હતી. જે પુનામાં ભાગીદારીમાં કિર્તી શ્રી ઈન્ડસ્ટ્રીઝ નામની કંપની ધરાવતો હતો. જેમાં સિમેન્ટ ગ્રાઈન્ડિંગ મશીન બનાવતા હતા. જેમાં ડાયરેકટર તરીકે તેનો પુત્ર અદીત પણ હતો.
વધુમાં ફરિયાદીએ જણાવ્યું હતું કે, વર્ષ 2021માં સિમેન્ટ ગ્રાઈન્ડિંગ મશીન ખરીદવા માટે બંને આરોપીઓ સાથે નોટરાઈઝડ કરાર કર્યો હતો. એટલું જ નહીં તેની કંપનીના બેન્ક ખાતામાંથી આરોપીઓની કંપનીના બેન્ક ખાતામાં કટકે-કટકે રૂ. 5.50 કરોડ જમા કરાવ્યા હતા.
જેના બદલામાં આરોપીઓએ પોતાની કંપનીના કોરા ચેક આપ્યા હતા. જો આરોપીઓ મશીનરી પૂરી પાડી ન શકે તો ચેક દ્વારા પેમેન્ટ પરત કરવાની મૌખિક વાત પણ કરી હતી.
ત્યાર પછી આરોપીઓને અવાર-નવાર મશીનરી પુરી પાડવા અઠવાડિયા તો રૂપિયા પરત આપવાનું કહેતા હતા. પરંતુ આરોપીઓ કાંઈ કરતાં ન હતા. આ પછી આરોપીઓ રાજકોટ ખાતે આવતા મિટીંગ થઈ હતી. જેમાં કરાર રદ કરવાનું નકકી થતાં તે મુજબનું લખાણ તૈયાર કરાવ્યું હતું. જેમાં આરોપીઓએ તેની કંપનીને રૂ. 5.75 કરોડ ચુકવવાના નીકળે છે તેવું સ્વીકાર્યું હતું તેમજ તા. 19-7-2023 સુધીમાં 40 લાખ અને બાકીની રકમ તા. 23-12-2033 સુધીમાં આપવાનું નકકી થયું હતું.
ત્યાર પછી પણ આરોપીઓએ રકમ પરત કરી ન હતી. જેને કારણે નકકી થયા મુજબ આરોપીઓએ આપેલા ચેક બેન્કમાં જમા કરાવતા રીર્ટન થયા હતા. બાદમાં આરોપીઓ વિરૂધ્ધ કોર્ટમાં નેગોશિએબલ ઈન્સ્ટ્રુમેન્ટ એકટ મુજબ ફરિયાદ કરી હતી.બનાવમાં ચેક રિટર્ન કેસમાં કાર્યવાહી કરવા બંકિમ મહેતાએ તેની કંપનીના મેનેજર જસ્મીનભાઈ માઢક (રહે. નવલનગર)ને ઓથોરિટી આપી હતી. બંને આરોપીઓ ગઈ તા. 11ના રોજ કોર્ટમાં મુદતે આવ્યા હતા. તે વખતે તેની કંપનીના મેનેજર જસ્મીનભાઈ પણ કોર્ટ મુદતે ગયા હતા. કોર્ટની બહાર સીડી ઉતરતી વખતે બંને આરોપીઓએ જસ્મીનભાઈ સાથે બોલાચાલી કરી કહ્યું કે તમે લોકો આ કેસ પાછો ખેંચી લેજો, નહીંતર તને અને તારા શેઠમાંથી એકપણને જીવતા નહીં રહેવા દઈએ. વધુમાં બંને આરોપીઓએ કહ્યું કે આ સિમેન્ટની લાઈનમાં અમે ખુબ જ જૂના છીએ, તમને લોકોને હું સિમેન્ટનો ધંધો પણ કરવા દઈશ નહિ.
