Rajkot,તા.18
રાજકોટ સહિત રાજયભરમાં રાઈડ્સ-ગેમઝોન સંબંધી નિયમોમાં સુધારા-વધારા માટે અંતે રાજયભરના તમામ જીલ્લા કલેકટરો અને પોલીસ કમિશ્નરોને ગૃહ વિભાગ દ્વારા છૂટ્ટ આપી દેવામાં આવી છે. જેના પગલે અંતે લોકમેળાની રાઈડ્સ માટેનો માર્ગ હવે ખુલી જવા પામેલ છે.
અહીં ઉલ્લેખનીય છે કે, લોકમેળાની રાઈડસની એસઓપીનો વિવાદ છેલ્લા એક વર્ષથી વકર્યો હતો જેના પગલે તેની સામે રાઈડસ સંચાલકોએ લડતના મંડાણ કર્યા હતા. રાજકોટના ભાતીગળ લોકમેળાની રાઈડસના મુદે ગત વર્ષે રાઈડસ સંચાલકોએ હાઈકોર્ટના દ્વારા ખખડાવ્યા હતા.
ત્યારબાદ ચાલુ વર્ષે પણ લોકમેળા માટે રાઈડસ સંચાલકોએ પ્લોટ માટેના ફોર્મ નહીં ભરી રાઈડસ માટેની એસઓપીમાં છુટછાટ આપવાની માંગણી ઉઠાવી આ પ્રકરણમાં રાજયના મુખ્યમંત્રી, ગૃહ મંત્રી, રાજય સરકારના યાંત્રિક વિભાગના સચીવ તેમજ સાંસદને રજૂઆત કરી હતી.
જેના પગલે અંતે આજે રાજય સરકારના ગૃહ વિભાગના ઉપ સચીવ શ્રધ્ધા પરમારે લોકમેળા-ગેમઝોન અંગે એસઓપીમાં છુટછાટ આપતો ખાસ પરિપત્ર ઈશ્યુ કરી દીધો છે. જે અંતર્ગત લોકમેળાઓમાં રાઈડસના લાયસન્સ આપવા અંગેના સૂચનો કરવામાં આવેલ છે. એમ્યુઝમેન્ટ રાઈડસ અને ગેમીંગ ઝોન એકટીવીટી સેફટી રૂલ્સ 2024ના સંદર્ભમાં આ સૂચનો કરવામાં આવેલ છે.
જેમાં હાલના નિયમ મુજબ રાઈડસ માટે લાયસન્સની અરજી કર્યાના 60 દિવસમાં લાયસન્સ આપવાનું રહે છે જો કે તહેવારો દરમ્યાન યોજાતા મેળાના આયોજકોને પડતી મુશ્કેલીને ધ્યાનમાં રાખીને લોકમેળા- આનંદ મેળાઓના કિસ્સામાં લાયસન્સ આપવાની સમય મર્યાદા ઘટાડીને 30 દિવસની કરવાની ભલામણ કરવામાં આવી છે.
આ ઉપરાંત સ્થાનિક સરકારી ઈજનેરોની નિમણુંકના મામલે સીટી ડીસ્ટ્રીકટ રાઈડસ સેફટી એન્ડ ઈન્સ્પેકશન કમીટીમાં હાલમાં એકથી વધુ જીલ્લાઓની જવાબદારી સંભાળતા ઈજનેરો નિમાયેલા છે.
તેના બદલે જે તે જીલ્લા શહેર ખાતે ઉપલબ્ધ વર્ગ-2 કે તેથી ઉપરના સ્થાનિક સરકારી ઈજનેરોને કમીટીમાં સમાવેશ કરવાનું સુચન કરવામાં આવેલ છે. જેનાથી લાયસન્સ પ્રક્રિયા ઝડપી બનશે અને મેળાનું સમયસર આયોજન સુનિશ્ચિત થશે.
મેળાની રાઈડસ માટે ફાઉન્ડેશનના નિયમમાં આયોજકોએ રાઈડસ માટે જરૂરીયાત મુજબ એન્જીનીયર દ્વારા સૂચવાયલ સોઈલ સ્ટ્રેબીલીટી રીપોર્ટ અને રાઈડસની રોડ બેરીંગની કેપેસીટી ધ્યાનમાં લેવા ફાઉન્ડેશન તૈયાર કરવાની ગાઈડલાઈન આપવામાં આવી છે.
જેમાં માર્ગ અને મકાન વિભાગના ઈજનેરની તપાસ બાદ જરૂરી સુચના મળે તો તપાસ બાદ ફેરફાર કરવાનો રહેશે અને જો જરૂર ન હોય તો આરસીસી ફાઉન્ડેશનનો આગ્રહ રાખવામાં આવશે નહીં.
આ ઉપરાંત આ અંગેના લાયસન્સની ગણત્રી આયોજકને ઓપરેશન લાયસન્સ મળ્યા તારીખથી કરવામાં આવશે. જે અરજદારે તેમની અરજીમાં દર્શાવેલ દિવસો મુજબ મહતમ 90 દિવસની મર્યાદામાં રહેશે.
ગૃહ વિભાગ દ્વારા રાજયના તમામ કલેકટરો અને પોલીસ કમિશ્નરોને એમ્યુઝમેન્ટ રાઈડસ અને ગેમીંગ ઝોન એકટીવીટી સેફટી રૂલ્સ 2024માં આ જાહેર કરાયેલ ગાઈડલાઈન સુધારા વધારા કરતા આદેશ આપતો પરીપત્ર કરી દેવામાં આવેલ છે જેના પગલે એસઓપીમાં છુટછાટ મળતા લોકમેળામાં રાઈડસ માટેનો માર્ગ હવે ખુલ્લો થયેલ છે.
