Bengaluru,તા.૩૧
કર્ણાટક હાઈકોર્ટે મંગળવારે પૂર્વ ક્રિકેટર રોબિન ઉથપ્પાની ધરપકડ વોરંટ પર કામચલાઉ સ્ટે મૂકી દીધો છે. પ્રોવિડન્ટ ફંડ ફ્રોડના કથિત કેસમાં તેમની સામે વોરંટ જારી કરવામાં આવ્યું હતું. જસ્ટિસ સૂરજ ગોવિંદરાજની આગેવાની હેઠળની બેંચ દ્વારા ઉથપ્પાને આ વચગાળાની રાહત આપવામાં આવી હતી અને વોરંટ અને પીએફ કેસ સંબંધિત તમામ કાર્યવાહી પર વચગાળાનો સ્ટે મૂકવામાં આવ્યો હતો.
આ નિર્ણય રોબિન ઉથપ્પાની અરજી પર આપવામાં આવ્યો છે, જેમાં તેણે રિકવરી નોટિસ અને તેની સામે જારી કરાયેલ ધરપકડ વોરંટ રદ કરવાની માંગ કરી હતી. તેમની સામે આ વોરંટ બેંગલુરુ પોલીસ દ્વારા પ્રાદેશિક પીએફ કમિશનર અને રિકવરી ઓફિસરના આદેશ પર જારી કરવામાં આવ્યું હતું, જેમાં ઉથપ્પાની ધરપકડ નિશ્ચિત માનવામાં આવી હતી.
રોબિન ઉથપ્પા પર પીએફમાં છેતરપિંડીનો આરોપ છે, વાસ્તવમાં આ વિવાદ એક પ્રાઈવેટ ફર્મ સેંટારસ લાઈફસ્ટાઈલ બ્રાન્ડ સાથે સંબંધિત છે. ઉથપ્પા ૨૦૧૮ થી ૨૦૨૦ સુધી તેના ડિરેક્ટર હતા. પીએફ અધિકારીઓ દ્વારા જારી કરવામાં આવેલી નોટિસ અનુસાર, કંપની દ્વારા કર્મચારીઓના પીએફ યોગદાનની કપાત કરવામાં આવી રહી હતી, પરંતુ આ રકમ તેમના ખાતામાં જમા કરવામાં આવી ન હતી. આ રકમ અંદાજે ૨૩.૧૬ લાખ રૂપિયા છે.
રોબિન ઉથપ્પા તરફથી હાજર રહેલા વરિષ્ઠ વકીલ પ્રભુલિંગ નવદગીએ કોર્ટને જણાવ્યું કે ઉથપ્પાએ ૨૦૨૦માં ફર્મના ડિરેક્ટર પદ પરથી રાજીનામું આપી દીધું હતું. આ સિવાય તેમના કાર્યકાળ દરમિયાન પણ તેઓ કંપનીના રોજબરોજના કામકાજમાં સામેલ નહોતા. આ માટે તેણે કંપનીના સ્થાપક કૃષ્ણદાસ થાનંદ હવડે સાથે પણ કરાર કર્યો હતો.
ઉથપ્પાના વકીલે કહ્યું કે ૨૨ ડિસેમ્બરે ઉથપ્પાએ સત્તાવાળાઓને કહ્યું હતું કે તે આ કંપનીના ડાયરેક્ટર નથી અને કંપનીના કોઈપણ મેનેજમેન્ટ અથવા રોજબરોજના કામકાજમાં સામેલ નથી અને તેથી તેમની સામે ઇપીએફ એક્ટ હેઠળ કેસ નોંધવો જોઈએ. એમ્પ્લોયર ગણી શકાય નહીં. આ કેસમાં બંને પક્ષોને સાંભળ્યા બાદ હાઈકોર્ટે પોતાનો ચુકાદો આપ્યો છે.
