New Delhi,તા.૨૦
દિલ્હીની રાઉઝ એવન્યુ કોર્ટે દિલ્હીના વર્તમાન મંત્રી કપિલ મિશ્રાના આચારસંહિતાના ઉલ્લંઘનના કેસ અંગે સ્ટેટસ રિપોર્ટ માંગ્યો છે. કોર્ટે ડીસીપીને આગામી સુનાવણીની તારીખ પહેલાં વિગતવાર રિપોર્ટ રજૂ કરવાનો આદેશ આપ્યો. કોર્ટ ૮ એપ્રિલે આ કેસમાં આરોપો પર દલીલો સાંભળશે.
૨૩ જાન્યુઆરી, ૨૦૨૦ ના રોજ, મંત્રી કપિલ મિશ્રાએ સોશિયલ મીડિયા હેન્ડલ એકસ પર દિલ્હી વિધાનસભા ચૂંટણી અંગે કથિત વાંધાજનક નિવેદન પોસ્ટ કર્યું હતું. જેના કારણે હોબાળો મચી ગયો હતો. આ નિવેદન અંગે ચૂંટણી અધિકારીએ તેમની સામે ફરિયાદ નોંધાવી હતી.
આ ફરિયાદના આધારે, એફઆઇઆર નોંધવામાં આવી હતી. ૭ માર્ચના રોજ આપેલા પોતાના આદેશમાં, સેશન્સ કોર્ટે કહ્યું હતું કે તે મેજિસ્ટ્રેટ કોર્ટના નિર્ણય સાથે સંપૂર્ણપણે સંમત છે કે ચૂંટણી અધિકારી દ્વારા દાખલ કરવામાં આવેલી ફરિયાદ લોક પ્રતિનિધિત્વ અધિનિયમની કલમ ૧૨૫ હેઠળ ગુનાની નોંધ લેવા માટે પૂરતી છે. જોકે, આ પહેલા કપિલ મિશ્રાને આ કેસ અંગે દિલ્હી હાઈકોર્ટ તરફથી ઝટકો લાગ્યો છે. કોર્ટે કપિલ મિશ્રા વિરુદ્ધ નીચલી કોર્ટમાં ચાલી રહેલી કાર્યવાહી પર રોક લગાવવાનો ઇનકાર કરી દીધો છે.
જસ્ટિસ રવિન્દ્ર દુડેજાએ કહ્યું કે, નીચલી કોર્ટની કાર્યવાહી પર રોક લગાવવાની કોઈ જરૂર નથી. નીચલી કોર્ટને આ કેસમાં આગળ વધવાની સ્વતંત્રતા છે. તે જ સમયે, હાઇકોર્ટે પોલીસને નોટિસ અંગે ૪ અઠવાડિયાનો સમય આપ્યો છે અને આગામી સુનાવણીની તારીખ ૧૯ મે નક્કી કરી છે. આ કેસમાં સુનાવણી ૨૦ માર્ચે નીચલી કોર્ટમાં થવાની છે.
અગાઉ ૭ માર્ચે, સેશન્સ કોર્ટે મિશ્રાની રિવિઝન અરજી ફગાવી દીધી હતી અને કહ્યું હતું કે તેમનું નિવેદન ધર્મના આધારે નફરતને પ્રોત્સાહન આપવાનો પ્રયાસ હોવાનું જણાય છે, જે પરોક્ષ રીતે દેશનો ઉલ્લેખ કરે છે, જેનો ઉપયોગ ઘણીવાર બોલચાલની ભાષામાં ચોક્કસ ધર્મના સભ્યોને દર્શાવવા માટે થાય છે.
દિલ્હી વિધાનસભા ચૂંટણી ૨૦૨૦ દરમિયાન, નાગરિકતા સુધારા કાયદા હેઠળ રાજધાનીમાં વિરોધ પ્રદર્શન ચાલી રહ્યા હતા. દરમિયાન, ચૂંટણી દરમિયાન, કપિલ મિશ્રાએ તેમના સોશિયલ મીડિયા હેન્ડલ ’ઠ’ પર પોસ્ટ કરી હતી અને સીએએ વિરુદ્ધ આંદોલનની આડમાં વાતાવરણ બગાડવા માંગતા અસામાજિક અને રાષ્ટ્રવિરોધી તત્વોની ટીકા કરી હતી.
