નોવેલ ‘ઈન્ડિયાઝ મોસ્ટ ફિયરલેસ ૩’ આધારિત ફિલ્મ, ગલવાન વેલીમાં ભારતીય સૈનિકોની વીરતા દર્શાવવામાં આવશે
Mumbai, તા.૩
સલમાન ખાનની છેલ્લી ફિલ્મ ‘સિકંદર’ને બોક્સઓફિસ પર ઠીકઠાક રિસ્પોન્સ મળ્યો પછી પણ ફિલ્મમેકર્સ અને ઓડિયન્સનો સલમાન પરનો વિશ્વાસ ડગ્યો નથી. ૨૦૨૦માં ગલવાન વેલીમાં ભારત-ચીન વચ્ચે થયેલા ઘર્ષણ આધારિત ફિલ્મનું આયોજન થયું છે, જેમાં સલમાન ખાનને ભારતીય આર્મી ઓફિસરનો રોલ ઓફર થયો છે. ‘ઈન્ડિયાઝ મોસ્ટ ફિયરલેસ ૩’ નામના પુસ્તક આધારિત ફિલ્મનું ડાયરેક્શન અપૂર્વ લાખિયા કરવાના છે. અપૂર્વ લાખિયાનુ ડાયરેક્શન ધરાવતી જાણતી ફિલ્મોમાં ‘શૂટઆઉટ એટ લોખંડવાલા’નો સમાવેશ થાય છે, જે સત્યઘટના આધારિત ફિલ્મ હતી. અપૂર્વ લાખિયા લાંબા સમયથી ગલવાન વેલીમાં ભારત-ચીન ઘર્ષણ પર ફિલ્મ બનાવવા માગતા હતા. આ ફિલ્મની સ્ટોરી અને કેરેક્ટર અંગે સલમાન તથા અપૂર્વ વચ્ચે વાતચીત થઈ હતી. ‘ઈન્ડિયાઝ મોસ્ટ ફિયરલેસ ૩’ નોવેલનું નેરેશન સાંભળ્યા પછી સલમાન પણ અપૂર્વની ઓફર સ્વીકારવાનું વિચારી રહ્યા છે અને ટૂંક સમયમાં આ અંગે જાહેરાત થઈ શકે છે. શિવ અરુર અને રાહુલસિંગે લખેલા પુસ્તકમાં ભારતીય સૈનિકોની વીરતા દર્શાવવામાં આવી છે. પુસ્તકમાં ગલવાન વેલીને લગતું પ્રકરણ સલમાનને ખૂબ પસંદ આવ્યું છે. સલમાન ખાનના હાથ પર ઘણી ફિલ્મો છે, પરંતુ તેઓ આ ફિલ્મનું શૂટિંગ ઝડપથી શરૂ કરવા માગે છે. સલમાન અને ફિલ્મ મેકર્સ દ્વારા આ પ્રોજેક્ટની ઓફિશિયલ એનાઉન્સમેન્ટ થયા પછી ત્રણ-ચાર મહિનામાં જ શૂટિંગ શરૂ કરવાનું આયોજન છે. સલમાન ખાન પાસે અન્ય ઘણી ફિલ્મો છે અને શાહરૂખની જેમ ધમાકેદાર કમબેક કરવા સલમાન તત્પર છે. સલમાન ખાન સાથે ‘સુલતાન’, ‘ટાઈગર ઝિંદા હૈ’ અને ‘ભારત’ બનાવનારા અલી અબ્બાસ ઝફર એક એક્શન એન્ટરટેઈનર બનાવવા માગે છે. ‘બજરંગી ભાઈજાન’ના ડાયરેક્ટર કબીર ખાન પણ સલમાન સાથે ફિલ્મ બનાવવા માગે છે. સૂરજ બરજાત્યાએ સલમાનને ફેમિલી ફિલ્મ ઓફર કરેલી છે. આમ, આગામી સમયમાં સલમાન ખાન વધુ જોમ સાથે આગળ વધવા કમર કસી રહ્યા છે. એક્શન અને ઈમોશનની સાથે એન્ટરટેઈનમેન્ટ આપવા સલમાન સજ્જ હોય તેમ જણાય છે.
