ક્રાઇમ બ્રાન્ચે ચોટીલાના હરેશ ચાવડાની ધરપકડ કરી તમામ મુદ્દામાલ રિકવર કર્યો
Rajkotતા.21
શહેરની ભાગોળે આવેલા માલિયાસણના સાગર ઇન્ડસ્ટ્રીયલ એરિયા સ્થિત પાર્ટી પ્લોટમાંથી લગ્ન ડેકોરેશન સહિતની રૂ. 1.60 લાખની ચીજ-વસ્તુ ઉઠાવી જનાર તસ્કરને ક્રાઈમ બ્રાન્ચની ટીમે ઝડપી લઇ તમામ મુદ્દામાલ રિકવર કર્યો છે. નજીક સાગર ઇન્ડસ્ટ્રીયલ પાર્કમાં ભાડેથી ઓમ પાર્ટી પ્લોટ ચલાવતા ભાવીનભાઇ રમેશભાઈ ચોવટીયાએ નોંધાવેલી ફરિયાદમાં જણાવ્યું હતું કે, સાથોસાથ વેલનાથપરામાં ભગવતી મંડપ સર્વિસ ચલાવે છે. ગઈ તા.૦૩/૦૩/૨૦૨૫ ના રોજ લગ્નની સીઝન પુર્ણ થતા ઓમ પાર્ટી પ્લોટ ખાતે લગ્ન ડેકોરેશનને લગતી ચીજવસ્તુઓ જેમા ખુરશી, લાઈટો, ટેબલોની ગણતરી કરી પાર્ટી પ્લોટ ખાતે રાખેલ હતી. બાદમા તા. ૧૮/૦૩/૨૦૨૫ ના રોજ પાર્ટી પ્લોટ ખાતે જઈને જોતા લાકડાની પાટવાળા લોખંડની ફ્રેમ વાળા 65 ટેબલ, 11 પાર-લાઈટ, 30 પ્લાસ્ટીકની સફેદ કલરની ખુરશીઓ એમ મળી કુલ રૂ. 1,60,100ની મતાની ચોરી થયાની ફરિયાદ કુવાડવા પોલીસમાં નોંધાવી હતી. તપાસ કરતા ક્રાઇમ બ્રાન્ચ પીઆઈ એમ આર ગોંડલીયા, એમ એલ ડામોર અને સી એચ જાદવના માર્ગદર્શન હેઠળ એએસઆઈ સી એમ ચાવડા, હેડ કોન્સ્ટેબલ કનકસિંહ સોલંકી, ઉમેશભાઈ ચાવડાને મળેલી બાતમીના આધારે માલીયાસણ ચોકડી નજીક સાગર ઇન્ડસ્ટ્રીયલ એરીયામાંથી હરેશ વિનુભાઈ ચાવડા (ઉ.વ. 30 હાલ રહે રંગીલા સોસાયટી, નવાગામ, રાજકોટ. મૂળ રહે કાબરણ ગામ, ચોટીલા, સુરેન્દ્રનગર)ની ધરપકડ કરી 65 ટેબલ, 20 ખુરશી અને 11 પાર લાઈટ સહિત રૂ. 1.60 લાખનો મુદ્દામાલ રિકવર કર્યો હતો.
