New Delhi,તા.૧૪
ભારતના ભૂતપૂર્વ કેપ્ટન સૌરવ ગાંગુલીને ફરી એકવાર આંતરરાષ્ટ્રીય ક્રિકેટ પરિષદની પુરુષ ક્રિકેટ સમિતિના અધ્યક્ષ તરીકે નિયુક્ત કરવામાં આવ્યા છે. તેમની સાથે, તેમના ભૂતપૂર્વ સાથી અને અનુભવી બેટ્સમેન વીવીએસ લક્ષ્મણને પણ સમિતિના સભ્ય તરીકે ફરીથી ચૂંટવામાં આવ્યા છે.આઇસીસી એ આ પુનઃનિયુક્તિ વિશે માહિતી આપી. ૨૦૦૦ થી ૨૦૦૫ સુધી ભારતીય ક્રિકેટ ટીમનું નેતૃત્વ કરનાર ગાંગુલીને ૨૦૨૧ માં સૌપ્રથમ સમિતિના વડા તરીકે નિયુક્ત કરવામાં આવ્યા હતા. ત્યારબાદ તેમણે અનિલ કુંબલેનું સ્થાન લીધું, જેમણે ત્રણ કાર્યકાળ પછી રાજીનામું આપ્યું હતું.
ગાંગુલી અને લક્ષ્મણ ઉપરાંત, આ વખતે સમિતિમાં ઘણા અન્ય ભૂતપૂર્વ દિગ્ગજ ખેલાડીઓનો પણ સમાવેશ કરવામાં આવ્યો છે. આમાં અફઘાનિસ્તાનના ભૂતપૂર્વ બોલર હામિદ હસન, વેસ્ટ ઈન્ડિઝના મહાન બેટ્સમેન ડેસમંડ હેન્સ, દક્ષિણ આફ્રિકાના કેપ્ટન ટેમ્બા બાવુમા અને ઇંગ્લેન્ડના ભૂતપૂર્વ બેટ્સમેન જોનાથન ટ્રોટના નામનો સમાવેશ થાય છે.
આઇસીસીએ મહિલા ક્રિકેટ માટે એક નવી સમિતિની પણ રચના કરી છે. ન્યૂઝીલેન્ડની ભૂતપૂર્વ ઓફ સ્પિનર કેથરિન કેમ્પબેલને સમિતિના અધ્યક્ષ તરીકે નિયુક્ત કરવામાં આવ્યા છે. તેમની સાથે, ભૂતપૂર્વ ઓસ્ટ્રેલિયન ખેલાડી એવરિલ ફાહી અને ક્રિકેટ દક્ષિણ આફ્રિકાના પ્રતિનિધિ ફોલેટ્સી મોસેકીને પણ સભ્ય બનાવવામાં આવ્યા છે.
ઉલ્લેખનીય છે કે સૌરવ ગાંગુલી એવા પસંદગીના ક્રિકેટરોમાં સામેલ છે જેમણે વનડે ક્રિકેટમાં ૧૦,૦૦૦ થી વધુ રન બનાવ્યા છે. ગાંગુલી ભારતીય ક્રિકેટમાં તેમના મહત્વપૂર્ણ યોગદાન માટે જાણીતા છે. વર્ષ ૨૦૦૦ માં, જ્યારે ભારતીય ક્રિકેટ મેચ ફિક્સિંગના સંકટનો સામનો કરી રહ્યું હતું, ત્યારે ગાંગુલીને ટીમ ઈન્ડિયાના કેપ્ટન તરીકે નિયુક્ત કરવામાં આવ્યા હતા. તેમણે ટીમમાં વીરેન્દ્ર સેહવાગ, યુવરાજ સિંહ, હરભજન સિંહ અને ઝહીર ખાન જેવા નવા ખેલાડીઓને તક આપી અને ત્યારબાદ તેમની આક્રમક કેપ્ટનશીપ શૈલીએ ભારતીય ટીમને આત્મવિશ્વાસથી ભરી દીધી.
સૌરવ ગાંગુલીની કેપ્ટનશીપ હેઠળ, ટીમ ઈન્ડિયાએ વિદેશી ધરતી પર ઘણી મહત્વપૂર્ણ જીત મેળવી. ક્રિકેટમાંથી નિવૃત્તિ લીધા પછી, ગાંગુલી ક્રિકેટ વહીવટમાં પ્રવેશ્યા અને ૨૦૧૯ માં મ્ઝ્રઝ્રૈં ના પ્રમુખ પણ બન્યા. ગાંગુલી હાલમાં આઇસીસીમાં દિલ્હી કેપિટલ્સ માટે ક્રિકેટ ડિરેક્ટર તરીકે સેવા આપી રહ્યા છે.
